Santiago de Compostela, 1 de xullo de 2024

O presidente da Xunta, Alfonso Rueda, destacou hoxe que o Goberno galego, a través da Consellería de Economía e Industria, activa unha nova liña de apoio extraordinario ao sector da automoción de Galicia para o ano 2024 co obxectivo de apoiar á industria “nunha das súas grandes transformacións” como é a transición á mobilidade sostible.

O Consello da Xunta coñeceu hoxe deste programa que contará cun orzamento de 18 millóns de euros para este ano na procura de potenciar a colaboración coa automoción galega promovendo unha cadea de valor dixital, verde e resiliente, capaz de facer fronte “aos retos importantes” que hai por diante e que implican “investimentos” para toda a cadea de valor.

A nova liña de axudas, en concorrencia non competitiva, da resposta ás situacións da industria da automoción de Galicia nesta transición. Para acadar a meta, o programa contribúe a facer fronte aos gastos das empresas este mesmo ano. 

Así, tal e como explicou o presidente, para os proxectos de investimentos en equipamentos ou elaboración de proxectos de futuro, “as axudas serán do 70%, cun máximo de 300.000 euros”. E para actuacións en proxectos de aforro e eficiencia enerxética, “os apoios van do 35% ao 55%”, en función da tipoloxía de empresa, e ata o 65% para proxectos de enerxías renovables, establecéndose unha “axuda máxima de 700.000 euros”. 

O prazo de presentación de solicitudes abrirá o vindeiro 8 de xullo, permanecendo activo ata o 31 de outubro no caso dos proxectos de futuro e de investimento en equipamentos, e ata o 2 de setembro para as iniciativas centradas na eficiencia enerxética e nas renovables. 

Deste xeito, a Xunta reforza a súa aposta por un sector fundamental da economía de Galicia “ao representar máis do 13% do PIB, que suma máis de 200 empresas e preto de 25.000 empregos”, indicou Rueda. A automoción galega sempre ten estado á vangarda do sector con iniciativas orientadas cara o automóbil do futuro. 

Cómpre lembrar que o sector afronta unha das transformacións máis grandes da súa historia, na que a transición xusta ou a electrificación son puntos centrais do cambio de paradigma. Un escenario no que a Unión Europea fixou no 2035 a data para que os novos turismos e furgonetas no mercado sexan de cero emisións.

Sobre esta base, as empresas automobilísticas galegas están a dar os pasos necesarios cara unha mobilidade con máis infraestruturas; na que se impulsen os vehículos non contaminantes; máis intelixente; máis eficiente e segura; e más competitiva. Un contexto no que esta nova liña busca facilitar esta transición, actuando como un primeiro escudo de apoio. 

Ademais, a Xunta traballa no plan director da automoción, que recollerá as medidas, mecanismos e medios necesarios para reforzar un sector no que Galicia xa é un referente, fomentar a súa internacionalización e sustentabilidade, impulsar a innovación industrial, captar novos investimentos e incrementar o emprego.