A Xunta destaca a industria láctea como garantía de futuro para o rural
O conselleiro de Presidencia, Xustiza e Deportes, Diego Calvo, e a directora-xerente de Galicia Calidade, Ana Méndez, asistiron ao acto de presentación de novos sabores de Bico de Xeado
Oleiros (A Coruña), 29 de xuño de 2024
O conselleiro de Presidencia, Xustiza e Deportes, Diego Calvo, e a directora-xerente de Galicia Calidade, Ana Méndez, asistiron hoxe ao acto organizado pola marca Bico de Xeado para presentar os seus novos sabores, onde sinalaron a industria láctea como garantía de futuro para o rural.
Diego Calvo eloxiou o labor realizado por Cooperativa Agraria Provincial da Coruña, propietaria da marca Bico de Xeado, e das granxas O Cancelo, en Miño, e A Esperanza, en San Sadurniño, onde se produce o leite para a elaboración do xeado. O conselleiro referiuse á importancia de apostar polo sector leiteiro e polo potencial do leite como materia prima, co obxectivo de consolidar a marca Galicia como garantía de calidade tanto na produción en orixe como na transformación.
Pola súa banda, Ana Méndez salientou a aposta de Bico de Xeado polo selo de Galicia Calidade, levando o distintivo por todo o territorio nacional e sorprendendo aos consumidores con novos xeados, innovando e coas marcas da calidade e o produto saudable como bandeiras.
A empresa coruñesa conta co distintivo de calidade dende o ano 2021 superando no 2022 os 20 millóns de euros de facturación. Unha aposta pola calidade e a economía circular, destacou a directora-xerente de Galicia Calidade, e de posta en valor do leite producido polas vacas da propia cooperativa.
Imaxes relacionadas
