Sanxenxo (Pontevedra), 28 de xuño de 2024

O director xeral de Xustiza, José Tronchoni, foi recoñecido hoxe como Colexiado de Honra polo Colexio de Economistas de Pontevedra, no acto de confraternidade organizado anualmente polo ente colexial. No seu agradecemento pola distinción, o director xeral manifestou a súa firme crenza no traballo en equipo e no binomio economía e dereito como impulsor da xustiza.

José Tronchoni puxo en valor o servizo público para garantirlle á cidadanía o exercicio dos seus dereitos e a solución de problemas, e reafirmou a súa aposta por impulsar proxectos conxuntos entre a administración e os colexios profesionais en beneficio non só dos colexiados senón do conxunto da poboación. Referiuse tamén á importancia das novas tecnoloxías para fomentar a colaboración e a comunicación entre todos os operadores xurídicos e económicos, facilitando a proactividade e a transparencia na prestación dos servizos legais.

Nesta liña incidiu na Intelixencia Artificial como ferramenta transformadora nunha ampla gama de sectores, como o da economía. Precisamente o seu papel clave levou a Xunta a impulsar o anteproxecto de Lei para o desenvolvemento e impulso da Intelixencia Artificial, o que converterá Galicia na primeira rexión europea en ter unha norma propia que a regule para o seu desenvolvemento, implantación e impulso na Administración. A iniciativa súmase á Estratexia Galega de Intelixencia Artificial, que fai tamén de Galicia unha das primeiras comunidades en desenvolver esta ferramenta cunha visión estratéxica.

O director xeral recibiu a placa de Colexiado de Honra de mans do presidente do Consello Xeral de Economistas, Valentí Pich, nun acto no que tamén se entregaron os títulos aos novos colexiados e colexiadas, as insignias de prata e os títulos de Economistas Eméritos.