O alcalde da Veiga, Juan Anta Rodríguez, e o subdirector de Procesos Asistenciais de Enfermería da Fundación Pública Urxencias Sanitarias de Galicia-061, Óscar Estraviz Paz, visitaron hoxe a base desta ambulancia
A nova ambulancia do 061 con base na Veiga segue a reforzar a cadea de protección cardiopulmonar nas zonas rurais
A ambulancia, que comezou a prestar servizo este martes, 18 de xuño ás 00,00 horas, estará operativa as 24 horas do día, os 365 días do ano
A Veiga (Ourense), 20 de xuño de 2024
A nova ambulancia convencional da Fundación Pública Urxencias Sanitarias de Galicia-061 con base no concello da Veiga segue a reforzar a cadea de cardioprotección, impulsada pola Xunta nas zonas rurais.
Esta ambulancia, que comezou a prestar servizo este martes, 18 de xuño ás 00,00 horas, estará operativa as 24 horas do día, os 365 días do ano.
Durante a mañá de hoxe, o alcalde da Veiga, Juan Anta Rodríguez, acompañado do subdirector de Procesos Asistenciais de Enfermería da Fundación Pública Urxencias Sanitarias de Galicia-061, Óscar Estraviz Paz, visitaron as instalacións da base da ambulancia neste concello.
A ambulancia convencional de Urxencias Sanitarias de Galicia-061 con base e zona de cobertura preferente no municipio da Veiga conta cun desfibrilador externo semiautomático (DESA) e un técnico en emerxencias sanitarias con formación no uso do mesmo. Deste xeito, en caso de emerxencia, acúrtanse os tempos ata a realización da masaxe cardíaca e a desfibrilación temperá.
Este modelo de recurso asistencial comezou a implantarse no ano 2019 noutras zonas do rural, como Pedrafita e Folgoso do Courel, co obxectivo de mellorar a cardioprotección en zonas afastadas e de difícil acceso.
Optimización da cobertura asistencial
O aumento dos recursos asistenciais da rede de transporte sanitario urxente terrestre de Galicia-061 optimiza a cobertura destas zonas de grande extensión e dispersión poboacional, que inflúen na distancia co seu hospital de referencia. Ademais, a incorporación deste recurso permitirá mellorar os tempos de asistencia á poboación e incrementar a calidade asistencial coa atención presencial daqueles pacientes que necesiten coidados sanitarios.
A asistencia sanitaria realizada polo persoal do 061 de Galicia, tanto no punto no que se atope o paciente como durante o traslado, está en todo momento coordinada e supervisada en tempo real desde a Central de Coordinación, por médicos coordinadores especialistas na atención da urxencia e a emerxencia extrahospitalaria.
Coa incorporación da ambulancia convencional da Veiga, a rede de transporte sanitario urxente terrestre de Galicia-061 dispón de 12 ambulancias asistenciais de soporte vital avanzado medicalizadas, cinco ambulancias asistenciais de soporte vital avanzado de enfermería, dous helicópteros medicalizados, 107 ambulancias asistenciais de soporte vital básico e tres ambulancias convencionais.
Todos estes recursos, mobilizados desde a Central de Coordinación do 061, garanten a asistencia ás urxencias e ás emerxencias extrahospitalarias en Galicia as 24 horas do día, os 365 días do ano.
A decisión de incrementar a rede de transporte sanitario urxente terrestre do 061 cunha ambulancia convencional con base no concello da Veiga confirma o compromiso da Xunta por mellorar a atención ás urxencias e as emerxencias neste concello e na súa área de referencia.