Santiago de Compostela, 10 de xuño de 2024

O presidente da Xunta, Alfonso Rueda, mantivo hoxe un encontro co presidente da Federación Galega de Municipios e Provincias (Fegamp), Alberto Varela, co obxectivo de abordar cuestións que afectan ao eido local como o financiamento de servizos como as Unidades Asistencias ás Drogodependencias (UADs) ou o Servizo de Axuda ao Fogar (SAF). A reunión enmárcase na rolda dos contactos que o presidente ten previsto realizar ao longo deste mes e que continuará cos presidentes das deputacións provinciais e cos alcaldes de Lugo e Vigo.

Nunha intervención posterior ao encontro, o conselleiro de Presidencia, Xustiza e Deportes, Diego Calvo, lembrou que a Xunta xa vén incrementando de maneira progresiva a achega autonómica a este servizo financiando maior parte que o Goberno central. Así, neste 2024 o Goberno galego bate novo récord de investimento con máis de 130 millóns de euros que permiten sumar máis horas á disposición das entidades locais e aumentar a contía a esta prestación que depende dos concellos.

Coa revisión abordada hoxe actualizarase o acordo vixente desde 2021. Nesta liña, o conselleiro lembrou que en materia de servizos sociais, o Executivo estatal debe 200 millóns anuais a Galicia para aplicar a Lei de Dependencia ao asumir menos do 50% do financiamento que lle correspondería.

Na reunión tratouse tamén o caso das UADs que se acordou traspasar á Xunta, polo que se lle solicitou aos concellos implicados a información necesaria para seguir avanzando nos compromisos adquiridos na comisión creada para este asunto.

No que se refire aos avances na comisión técnica de delimitación de competencias que está a avaliar as propostas da Xunta -elaborado no marco dun acordo coa Universidade de Santiago (USC)-  e a Fegamp, o conselleiro explicou que a Xunta está á espera de que a Fegamp fixe novas datas de reunións desta comisión para continuar a clarificar as competencias de cada administración.

Na intervención posterior á reunión, Diego Calvo sinalou  tamén que o sistema de financiamento local ten que ir asociado á reforma do financiamento autonómico que o Goberno central debe tratar coas comunidades. Nesta liña, a Xunta defende que se teñan en conta criterios como a dispersión ou o envellecemento da poboación.

De feito, para compensar os desfases do actual sistema de financiamento, a Xunta incrementa cada ano as achegas ás entidades locais a través do Fondo de Cooperación Local (FCL) acada os 152 millóns de euros este ano. De feito, Galicia foi pioneira en 2011 por garantir por lei a participación mínima dos concellos nos orzamentos da Xunta mediante este fondo. A suma do FCL e o resto das axudas da Xunta ás entidades locais supera os 602 millóns este exercicio.