A Xunta realiza labores de conservación e mantemento no río Postillón, ao seu paso polo Concello de Cangas

As tarefas, que se centran nun treito de preto de 1,6 quilómetros, inclúen a roza puntual de arbustos e a retirada de árbores e biomasa da canle para evitar atoamentos

Santiago de Compostela, 5 de xuño de 2024

A Consellería de Medio Ambiente e Cambio Climático, a través de Augas de Galicia, comezou a executar hoxe actuacións de conservación e mantemento en preto de 1,6 quilómetros río Postillón, ao seu paso polo Concello de Cangas.

As tarefas, que se desenvolverán nun treito de preto 1,6 quilómetros ao seu paso pola parroquia de Santa María de Darbo, consisten na retirada de árbores e biomasa presente na canle fluvial para evitar atoamentos así como en labores de roza puntual de arbustos no acceso á canle.

As actuacións, que xa foron comunicadas ao Concello de Cangas, prolongaranse durante aproximadamente un mes e realizaranse mediante a aplicación de ferramentas manuais, o uso de motoserras e rozadoras co apoio dunha carretilla.

Unha vez finalizadas as obras programadas polo organismo de conca autonómico, este tramo do río Postillón quedará despexado de obstáculos, posibilitando así a circulación fluída das súas augas.

Cómpre subliñar que Augas de Galicia desenvolve este tipo de accións no marco do programa de mantemento, conservación e mellora do dominio público hidráulico das bacías de Galicia-Costa e nas súas zonas de acceso e protección. Neste caso trátase ademais do mantemento dunha zona catalogada como de alto risco potencial significativo de inundación.

O obxectivo é avanzar e mellorar os leitos fluviais para favorecer as condicións naturais do ecosistema dos ríos, actuando nas áreas nas que a Xunta ten competencias, fóra das tramas urbanas fluviais de responsabilidade municipal.

Imaxes relacionadas

Data de actualización: 05/06/2024