Santiago de Compostela, 31 de maio de 2024

As familias que solicitaron praza para o vindeiro curso 2024-2025 nas máis de 170 escolas infantís públicas autonómicas poden consultar as listaxes definitivas de admitidos na páxina web da Consellería de Política Social e Igualdade. A partir de mañá ábrese o prazo para formalizar a matrícula e remata o vindeiro 14 de xuño.

As familias deberán presentar o impreso de matrícula cos datos debidamente cubertos xunto coa copia da cartilla de vacinación do neno, e facelo a través da sede electrónica da Xunta ou no centro onde obtivera praza. O inicio do curso nos centros de 0 a 3 anos da Administración autonómica está fixado para o día 6 de setembro.

Por terceiro ano consecutivo, no curso 2024-2025 a atención educativa será de novo gratuíta para o 100% do alumnado en todas as escolas infantís de Galicia durante oito horas ao día e once meses ao ano, tanto nas que forman parte da rede pública autonómica da Xunta como nas que dependen dos Concellos, nas de iniciativa social e nas privadas. Galicia é nestes momentos líder nacional na escolarización da etapa 0 a 3 anos, cunha taxa do 56%, dez puntos por riba da media nacional.