Rueda salienta que O Son do Camiño permite situar a comunidade na elite da música internacional e levar a marca Galicia por todo o mundo
“Son tres días para desfrutar e nos que Galicia vai estar posta no mapa a través da música”, resaltou
A cita, que arranca mañá no Monte do Gozo, reunirá a 40.000 asistentes para ver a artistas como Green Day, Pet Shop Boys, Ana Mena, Baiuca ou J Balvin
Santiago de Compostela, 29 de maio de 2024
O presidente da Xunta, Alfonso Rueda, destacou hoxe que o festival O Son do Camiño, que mañá inicia a súa quinta edición, permite situar Galicia “no top da música europea e internacional” e se trata dunha cita que contribúe a levar “a marca Galicia” -vencellada ao Xacobeo- por todo o mundo.
Rueda visitou este mediodía as instalacións do Monte do Gozo onde se celebrará este certame que reunirá a 40.000 asistentes entre mañá e o vindeiro sábado e que terá sobre o escenario a artistas como Green Day, Love of Lesbian, Baiuca, Pet Shop Boys, Melendi, Ana Mena, Myke Towers, J Balvin ou Thirty Seconds to Mars.
O titular do Goberno galego fixo fincapé na importancia de este festival á hora de atraer visitantes á comunidade cunha elevada taxa de ocupación hoteleira. “Son tres días para desfrutar e nos que Galicia vai estar posta no mapa a través da música”, resaltou.