A conselleira de Política Social e Igualdade visitou as obras do novo centro, acompañada polo alcalde da localidade
A Xunta inviste 380.000 € na construción da nova escola infantil de Ordes que contará con 61 prazas
O Goberno galego puxo a disposición dos concellos dúas convocatorias de axudas que permiten a creación de 900 novas prazas
Galicia continúa a ser a única Comunidade con atención educativa 0-3 anos gratuíta durante oito horas ao día e once meses ao ano
Ordes (A Coruña), 19 de maio de 2024
A conselleira de Política Social e Igualdade, Fabiola García, visitou esta mañá as obras da futura escola infantil municipal de Ordes que a Xunta de Galicia financia con 380.000 euros e que contará con 61 prazas gratuítas para nenos e nenas de 0 a 3 anos.
Fabiola García, acompañada polo alcalde da localidade, José Luis Martínez Sanjurjo, supervisou o avance das actuacións que se están realizando no futuro centro de educación infantil e que se espera que entre en funcionamento ao longo do vindeiro curso.
A conselleira de Política Social e Igualdade destacou a importancia destes fondos para axudar aos Concellos de Galicia na posta en marcha de máis de 900 prazas de educación infantil por toda a Comunidade. De feito, a Xunta deu resposta ao 100 % das solicitudes e un total de 27 concellos recibiron axuda.
Líderes na escolarización 0 a 3
Galicia continúa a ser a única Comunidade Autónoma co 100 % das escolas infantís gratuítas durante oito horas ao día e once meses ao ano. Unha gratuidade que é posible grazas ao compromiso do Goberno galego con esta etapa e a un investimento de máis de 60 millóns de euros ao ano. A través desta medida, máis de 32.000 familias galegas aforran, cada ano, 3.000 euros na educación dos seus fillos e a nosa Comunidade conseguiu situarse como líder na taxa de escolarización de 0 a 3 anos en toda España.
Imaxes relacionadas
