Santiago de Compostela, 9 de abril de 2024

A Xunta comezou hoxe as obras de mellora do firme na estrada LU-723 ao paso polo concello de Becerreá.

A intervención nesta vía autonómica que comunica As Pontes de Gatín co límite da provincia de León conta cun investimento autonómico de preto de 93.000 euros.

Os traballos que se están a levar a cabo permitirán a mellora de 1.800 metros lineais da calzada, no tramo comprendido entre os quilómetros 0 e 20, favorecendo a seguridade viaria de todos os usuarios da vía.

En concreto, as intervencións comprenden o fresado localizado do firme existente e a reposición con formigón bituminoso naquelas zonas onde mediante unha inspección visual se constatou a presenza de microrroturas puntuais e zonas deformadas.

Unha vez rematadas as obras de rehabilitación do firme, procederase ao pintado da sinalización horizontal na totalidade da estrada.

Durante a execución destes traballos habilitaranse carrís alternativos de circulación e sinalización provisional de desvíos, cando sexa necesario.

Esta actuación forma parte do contrato de conservación ordinaria e vialidade invernal da Xunta na provincia de Lugo.