Santiago de Compostela, 6 de abril de 2024

A Xunta avanza no desenvolvemento de novas iniciativas activadas este ano para frear a expansión da velutina en Galicia. Estas medidas artéllanse en catro eixos -retirada de niños primarios, trampeo selectivo, formación, información e divulgación e investigación-, que se desenvolverán ao longo de todo o ano no conxunto do territorio da nosa comunidade.

Nesta liña, xa se están a celebrar charlas dirixidas á poboación en xeral para sensibilizar e concienciar sobre esta problemática, caso da organizada recentemente no municipio pontevedrés de Pazos de Borbén. Este labor de divulgación complementa os traballos sobre o terreo, mediante a retirada de niños primarios -xa iniciado en febreiro- e o trampeo selectivo, planificado e coordinado, que se está a implementar de xeito simultáneo nas catro provincias -o traballo iniciouse nas provincias da Coruña e Pontevedra e esta mesma semana sumáronse Lugo e Ourense-.

O trampeo é xeolocalizado e na súa instalación tense en conta a análise dos datos do 2023, para potenciar a súa efectividade. Fanse a través dun operativo de trampeo coordinado no que participa persoal da empresa pública Seaga ou traballadores do Servizo de Prevención e Defensa contra incendios da Xunta, que se unen ao dispositivo tras recibir a formación específica necesaria.

Este é un proceso aberto que atende aos máis rigorosos criterios técnicos e científicos, e ten en conta a análise dos datos recollidos en 2023 co obxectivo de potenciar a súa eficacia e abarcar a totalidade do territorio galego.  

Neste sentido, o Goberno autonómico está en conversas con concellos e mancomunidades para reforzar a coordinación deste proceso.

Captura das raíñas

O dispositivo de trampeo responde a unha das principais demandas do sector apícola e faise un seguimento da evolución da presenza da velutina a través do rexistro dos datos na aplicación informática Contravelutina. A información recompilada será avaliada de xeito continuado por un grupo de técnicos especializados e grazas aos resultados obtidos poderán tomarse medidas correctoras que melloren a eficacia deste sistema.

Os traballos de trampeo céntranse actualmente na captura de raíñas que ao comezo da primavera saen na procura de alimento e a construír os primeiros niños. Máis adiante, nos meses de outono e inverno, enfocaranse á captura de machos e de novas raíñas que emerxen dos niños secundarios. Tamén se realizará un trampeo selectivo nas abellarizas en canto aparezan os primeiros abáboros. Ademais, dentro da nova batería de medidas está o impulso á investigación científica para coñecer en maior profundidade o comportamento da velutina e frear con máis eficacia a súa propagación.

Renovación da encomenda a Seaga para a retirada de niños en toda Galicia

O Goberno autonómico renovou por quinto ano consecutivo a encomenda a Seaga para a execución do programa galego de vixilancia e control fronte a avespa velutina acordado no 2020 entre a Xunta e a Federación Galega de Municipios e Provincias (Fegamp), e que como novidade, este ano conta coa adhesión por vez primeira dos 313 concellos galegos.

Con este acordo, a Xunta ofrece unha solución homoxénea, centralizada e coordinada cos concellos para a eliminación e retirada de niños desta especie a través do equipo de Seaga, que conta cun equipo encargado de organizar aos efectivos de intervención, que foron reforzados polo Goberno autonómico coa dotación de material e medios necesarios para esta actividade -dende pértegas e equipos de protección individual ata material informático-, ademais de contar coa formación específica necesaria.

A poboación pode notificar na liña específica do Teléfono de Atención e Información á Cidadanía 012 -operativa as 24 horas do día e os 365 días do ano- a detección dun niño de velutinas ou alertar da súa presenza, sendo posteriormente informadas a través dun servizo de comunicación vía SMS da resolución do aviso por parte da Xunta, que vén implantando nos últimos anos novas tecnoloxías para habilitar formas de contacto alternativas, como a app Contravelutina, na que ademais de incluír os datos do trampeo é empregada por Seaga para xestionar os avisos -introducindo en tempo real os datos de xeolocalización e fotografías do niño, as observacións de cada caso e o resultado final-.