A Xunta presenta o Orzamento Cidadán como un instrumento de transparencia para achegar de forma sinxela e comprensible os presupostos á cidadanía
O conselleiro de Facenda e Administración Pública, Miguel Corgos, presentou o documento nun acto ao que asistiron as alumnas e alumnos de segundo curso de bacharelato do IES Xelmírez II, de Santiago de Compostela
Miguel Corgos destacou que é a primeira vez en 42 anos de contas autonómicas que se presenta un Orzamento Cidadán
Trátase dun documento no que se explica de xeito sinxelo que é o orzamento, como se elabora, cales son as principais partidas de gasto e como se financian
O conselleiro de Facenda e Administración Pública, Miguel Corgos, presentou hoxe o Orzamento Cidadán, un documento que nace como un instrumento de transparencia para achegar de forma sinxela e comprensible os presupostos á cidadanía. A esta presentación asistiron as alumnas e alumnos do segundo curso de bacharelato do IES Xelmírez II de Santiago.
Durante o acto, Miguel Corgos destacou que esta iniciativa se presenta por primeira vez nos 42 anos de presupostos autonómicos, co obxectivo de que as contas non só estean a disposición da cidadanía, senón que sexan comprensibles para ela: que coñezan como se elaboran os presupostos e a que se dedican os seus impostos.
Neste sentido, o conselleiro de Facenda e Administración Pública explicou que o Orzamento Cidadán é un documento no que se explica de xeito sinxelo que é o presuposto, como se elabora, cales son as principais partidas de gasto e como se financian estas partidas.
A súa principal finalidade é a de trasladar a información de maneira sinxela para que calquera cidadán coñeza o principal instrumento económico financeiro de Galicia e as súas principais características.
O documento estrutúrase en varios apartados no que se explica o que se entende por orzamento; cales son os conceptos necesarios para entendelo; o ciclo orzamentario desde que se deseñan ata que se aproban polo Parlamento; detalles dos gastos das diferentes consellerías, sobre todo das políticas sanitarias, educativas e sociais, ás que se dedica practicamente o 75% do total do presuposto; a orixe dos ingresos, e así como tamén diversa información que pode ser de utilidade para a cidadanía.
Este documento poderá consultarse na páxina web da Consellería de Facenda e Administración Pública e terá un formato pdf descargable.