A Xunta concedeu este ano 550.000 euros a 124 pemes e autónomos lucenses para apoiar actuacións de aforro enerxético

Lugo, 19 de decembro de 2022 Un total de 124 empresas e autónomoslucenses obtiveron este ano apoios por valor total de 550.00 euros para acometer actuacións de aforro enerxético nos seus negocios con cargo ao Bono Enerxía Peme da Xunta.

O delegado territorial da Administración autonómica, Javier Arias, e o director xeral de Planificación Enerxética e Recursos Naturais, Pablo Fernández Vila, visitaron hoxe na cidade de Lugo un dos establecementos beneficiarios, o hotel Santiago, que accedeu a estes incentivos para substituír electrodomésticos antigos por novos aparatos de menor consumo e para mellorar a climatización. No municipio de Lugo hai 37 beneficiarios que suman 163.000 euros en axudas.

Ambos responsables autonómicos explicaron que o programa chegou a negocios de sectores variados repartidos por toda a provincia, como establecementos de aloxamento, locais de hostalería e restauración, comercios de diversos ramos, servizos de estética ou ximnasios, entre outros.

En canto á distribución por zonas, na comarca de Lugo concedéronse 47 axudas por importe de 207.000 euros; na Terra Chá e Meira 27 por valor de 121.500 euros – 20 delas no municipio de Vilalba -; na Mariña hai 24 pemes e autónomos que se benefician de 109.000 euros -; na Zona Sur aprobáronse 15 expedientes por 65.400 euros; no municipio de Sarria hai cinco por 13.800 euros; na área da Montaña catro que suman 20.300 euros concedidos; e na Ulloa dous con 10.500 euros en achegas.

Actuacións subvencionables

A Vicepresidencia primeira e Consellería de Economía, Industria e Innovación puxo en marcha esta liña de axudas o pasado ano para contribuír á reactivación ante a situación económica xerada pola pandemia e este ano retomouna no marco do Plan de Choque para afrontar a inflación.