A directora xeral de Calidade Ambiental, Sostibilidade e Cambio Climático presentou hoxe o balance climatolóxico do outono en MeteoGalicia
Galicia rexistrou un outono moi cálido e moi húmido
A temperatura media de 15,9 ºC, o que supón unha anomalía positiva de +1,4 graos con respecto á media da serie histórica
A chuvia media para as 16 estacións que compoñen a serie rexional foi de 588 l/m2, un 35% superior á media
Galicia rexistrou un outono moi cálido e moi húmido segundo o Informe climatolóxico elaborado por MeteoGalicia que foi presentado hoxe pola directora xeral de Calidade Ambiental, Sostibilidade e Cambio Climático, Sagrario Pérez.
Segundo o informe, o outono de 2022 foi moi cálido cunha temperatura media de 15,9 ºC, o que supón unha anomalía positiva de +1,4 graos con respecto á media da serie histórica 1981-2010. Sagrario Pérez explicou que isto se debeu principalmente a que as temperaturas mínimas foron moi cálidas –sobre todo no mes de outubro- (+1,9 ºC) mentres que as máximas foron cálidas (+1 ºC).
Máis polo miúdo, no Macizo de Manzaneda e en Pena Trevinca rexistráronse os valores máis baixos de temperaturas -en torno aos 7,1 graos- mentres que os máis altos corresponden a gran parte do oeste da provincia de Pontevedra e ao noroeste da Coruña, onde acadan os 17,9 ºC.
No que atinxe ao balance pluviométrico, a chuvia media para as 16 estacións que compoñen a serie rexional foi de 588 l/m2, un 35% superior á media, o que supón que se considere “un outono moi húmido”, segundo dixo Sagrario Pérez. Nesta liña, engadiu que isto se debeu ás precipitacións xeneralizadas e persistentes dos meses de outubro e novembro.
De feito no último mes as borrascas atlánticas afectaron de xeito continuo á Comunidade, deixando cantidades de chuvia moi elevadas que mesmo deron lugar nalgunhas xornadas a avisos por acumulación de precipitación.