A Xunta fai un chamamento á doazón de sangue debido a unha baixada xeneralizada das reservas
As reservas de sangue dos grupos 0 positivo e A positivo están en niveis máis baixos, polo que se fai un chamamento especial a doantes destes grupos
Santiago de Compostela, 14 decembro de 2022 A Axencia de Doazón de Órganos e Sangue (ADOS) fai un chamamento xeneralizado á participación de toda a cidadanía na doazón de sangue e, de forma especial, aos doantes dos grupos 0 positivo e A positivo. Debido as baixas reservas dos grupos O+ e A+, no día de onte procedeuse á reprogramación dunha vintena de intervencións cirúrxicas non urxentes en pacientes pertencentes a estes grupos.
Os pacientes afectados polas reprogramacións serán citados de novo tan pronto como sexa posible. A reprogramación supón adiantar intervencións cirúrxicas doutros pacientes cuxos grupos sanguíneos non teñan problemas de reservas de sangue.
A demanda de compoñentes sanguíneos e a coincidencia de días festivos na mesma semana provocaron unha diminución nas reservas de sangue. Neste sentido, a Xunta fai un chamamento á doazón de todos os grupos sanguíneos, e á participación nas campañas de doazón que realiza a Consellería de Sanidade por mediación de ADOS, xa que os hospitais galegos precisan entre 400 e 500 diarias para levar a cabo de forma axeitada o seu labor asistencial
A Axencia convida aos cidadáns a amosar o seu carácter xeneroso e solidario xa que, debido ao aumento na demanda de compoñentes sanguíneos, por mor do incremento da actividade asistencial dos hospitais galegos, e a coincidencia de días festivos na semana anterior, provocou unha diminución nos niveis de reservas dos distintos grupos sanguíneos
Ademais, as dez unidades móbiles da Axencia de Doazón de Órganos e Sangue visitarán nestes días diferentes concellos galegos para conseguir as doazóns precisas que garantan o desenvolvemento do gran labor asistencial dos distintos centros sanitarios de Galicia.
ADOS espera contar de novo coa solidariedade da cidadanía galega nos seguintes desprazamentos:
DATA | CONCELLOS |
Mércores 14 de decembro | E. de Especialidades Antonio de Escaño (Ferrol), Pontedeume, Toyota Breogán (Perillo-Oleiros), Obelisco (A Coruña), Corcubión, Jealsa (Boiro), Praza Roxa (Santiago), Ferrería (Pontevedra), AKWEL e Travesía (Vigo), Bº Augas Ferreas (Lugo), Xove, Trasmiras, Santa Baia, Cualedro e A Xironda (Cualedro) |
Xoves 15 de decembro | E. de Especialidades Antonio de Escaño (Ferrol), Cedeira, Acuart. de Atocha (A Coruña), Camelle e Ponte do Porto (Camariñas), Cerceda, Jealsa (Boiro), Cacheiras (Teo), Vilagarcía, Ponteareas, Goián (Tomiño), Chantada , CIE GALFOR (S. Cibrao das Viñas), Piñor Arenteiro |
Venres 16 de decembro | Bº Inferniño (Ferrol), Bº Novo Mesoiro (A Coruña), O Burgo (Culleredo), Boiro, Lestedo (Boqueixón), Vilagarcía, García Barbón (Vigo), Cangas do Morrazo, Praza Maior (Lugo), Foz, Xinzo de Limia, |
Sábado 17 de decembro | Neda, Fonteculler (Culleredo), Boiro, Vilagarcía, Cangas do Morrazo, Monterroso |
Ademais, tamén se pode doar sangue nos locais de doazón existentes nas sete grandes cidades galegas:
CENTRO | HORARIO |
HOSPITAL CLÍNICO UNIVERSITARIO DE SANTIAGO | Luns a venres das 8.00 ás 22.00 horas Sábado das 8.00 ás 15.00 horas |
HOSPITAL UNIVERSITARIO DA CORUÑA | Luns a venres das 8.00 ás 22.00 horas Sábado das 8.00 ás 15.00 horas |
HOSPITAL ARQUITECTO MARCIDE DE FERROL | Luns das 15.00 ás 22.00 horas Martes, mércores e xoves das 08.00 ás 15.00 horas Venres das 8.00 ás 22.00 horas |
HOSPITAL LUCUS AUGUSTI DE LUGO | Luns e venres das 15.00 ás 22.00 horas Martes, mércores e xoves das 08.00 ás 15.00 horas |
HOSPITAL UNIVERSITARIO DE OURENSE | Luns e venres das 15:00 ás 22:00 horas Martes, mércores e xoves das 8:00 ás 15:00 horas |
HOSPITAL PROVINCIAL DE PONTEVEDRA | Luns e venres de 08.00 ás 15.00 horas Martes, mércores e xoves de 15.00 horas a 22.00 horas |
HOSPITAL NICOLÁS PEÑA DE VIGO | Luns a venres das 8.00 ás 22.00 horas Sábados das 8.00 ás 15.00 horas |
Doar é moi sinxelo e seguro
Pode doar sangue calquera persoa maior de idade, que pese máis de 50 quilos e que non padeza nin teña padecido enfermidades transmisibles polo sangue. A doazón de sangue é un acto sinxelo que permite a moitas persoas solucionar o seu problema de saúde e mesmo salvar vidas. Ademais, sinalar que sempre están presentes as máis rigorosas medidas de seguridade.
Para máis información, ADOS dispón do sitio web: ados.sergas.gal, as redes sociais, e o teléfono gratuíto de información 900 100 828, para resolver calquera dúbida relacionada coa doazón de sangue ou coñecer a data dos desprazamentos das unidades móbiles.