A Xunta reforza a seguridade viaria na estrada OU-531 no treito coincidente coa vía da prata ao paso polos concellos de Sandiás e de Xinzo de Limia
A Consellería de Infraestruturas e Mobilidade está a levar a cabo a limpeza das marxes e cunetas da estrada e o reforzo da sinalización horizontal e vertical ao longo de 4 quilómetros desta vía autonómica
Estas actuacións forman parte das 39 intervencións de mellora da seguridade viaria que a Xunta acomete este ano en cruzamentos ou treitos paralelos das rutas xacobeas coas estradas autonómicas, cun orzamento de preto de 1,8 M€
O Goberno galego dálle así continuidade ás 70 obras que realizou o pasado ano, ás que destinou 1,4 M€ co fin de favorecer o tránsito seguro dos peregrinos
A Xunta está a executar obras de reforzo da seguridade viaria na estrada OU-531 ao seu paso polos concellos de Sandiás e de Xinzo de Limia, no treito coincidente co Camiño da Vía da Prata, co fin de favorecer o tránsito seguro dos peregrinos.
Esta intervención, que comezou a pasada semana e supón un investimento de máis de 5.000 euros, céntrase na poda e limpeza das marxas e cunetas da estrada e no reforzo da sinalización horizontal e vertical ao longo de 4 quilómetros desta vía autonómica, entre os puntos 0 e 4.
Coas obras que se están a executar búscase reforzar a seguridade neste tramo da OU-531 que discorre paralelo ao Camiño de Santiago e que carece de beirarrúa.
Esta nova intervención enmárcase no programa de 39 obras de mellora da seguridade viaria que a Consellería de Infraestruturas e Mobilidade está a executar este ano en cruzamentos ou treitos paralelos das rutas xacobeas coas estradas autonómicas, cun orzamento de preto de 1,8 millóns de euros.
A encomenda deste ano estase a levar a cabo nos distintos Camiños e trazados da Ruta Xacobea en tres provincias galegas. Na provincia da Coruña están programadas un total de 11 actuacións; na de Lugo, 23; e na de Ourense, 5.
Imaxes relacionadas
