O conselleiro de Cultura, Román Rodríguez, inaugura a mostra ‘Alfonso Sucasas, camiño e mitoloxía’ que poderá visitarse ata o 23 de abril
O Museo das Peregrinacións e de Santiago recupera e actualiza a obra de Sucasas sobre o fenómeno Xacobeo na nova exposición coa que pecha este Ano Santo
Comisariada por Pilar Corredoira, inclúe medio cento de pinturas, debuxos, bosquexos e documentos que preparou o artista lalinense para as mostras do Xacobeo 1993
Abre un diálogo entre dúas épocas distintas e permite facer un percorrido pola evolución dos principios, valores e motivos que representan a peregrinación
O titular de Cultura salienta que axudará a divulgar “a inigualable visión plástica innovadora sobre o Camiño dun dos artistas máis representativos do século XX”
Santiago de Compostela, 2 de novembro de 2022 O conselleiro de Cultura, Educación, FP e Universidades, Román Rodríguez, inaugurou hoxe no Museo das Peregrinacións e de Santiago a exposición Alfonso Sucasas, camiño e mitoloxía, que recupera e actualiza a obra do artista lalinense sobre o fenómeno xacobeo e coa que o museo pecha a súa programación expositiva deste dobre Ano Santo.
O titular de Cultura da Xunta salientou o valor desta nova proposta artística por “abrir un diálogo entre dúas épocas distintas que nos permitirá ver a evolución dos principios, valores, e motivos que representan o Ano Santo”. De feito, inclúe as pezas que Sucasas preparou para as exposicións do Xacobeo 1993, que agora se actualizan ao situarse no contexto deste Xacobeo 21-22.
Son, en total máis de medio cento de obras inspiradas na historia de Compostela e do Camiño de Santiago, que inclúen pinturas, debuxos, bosquexos e un amplo catálogo documental. Unha recompilación de pezas que lle permitiron a Sucasas “abrir un fío argumental de traballo que cultivaría nos anos seguintes”, indicou Román Rodríguez ao tempo que cualificou a mostra como “unha oportunidade para abondar na persoalísima interpretación das Rutas Xacobeas dun dos artistas mais representativos do século XX, coa súa visión plástica innovadora sobre a espiritualidade e a experiencia de camiñar cara a Santiago de Compostela”.
Máis de medio cento de obras
A mostra, comisariada por Pilar Corredoira, rememora o traballo que Alfonso Sucasas realizou durante o Xacobeo 93 e dá lugar a unha ampla colección integrada por debuxos e pinturas, algunhas de gran formato como Tríptico de Adán e Eva, Pecados capitais ou Santiago Peregrino.