A Xunta constrúe unha senda peonil na estrada LU-530 entre Carballido e Manzoi, no concello de Lugo
O delegado territorial, Javier Arias, explica que o Goberno galego inviste 185.000 euros para facilitar o tránsito a pé en condicións de seguridade nun treito da vía autonómica que coincide co Camiño Primitivo
Lugo, 3 de decembro de 2022 A Consellería de Infraestruturas e Mobilidade está a construír unha senda peonil de 1,3 quilómetros de lonxitude nun treito da estrada autonómica LU-530 que coincide co Camiño Primitivo entre os núcleos de Carballido e Manzoi, no concello de Lugo.
O delegado territorial da Administración galega, Javier Arias, comprobou hoxe a marcha dos traballos, nos que a Xunta inviste 185.000 euros co fin de reforzar a seguridade nesta zona na que conflúe o tránsito rodado co peonil.
O novo itinerario execútase na marxe esquerda da estrada, entre os pq 6+800 e 8+100. O trazado deseñouse por fóra da plataforma da vía, agás nun punto no que non é posible – do pq 6+800 ao 6+900 -, e no que discorrerá paralela á calzada pola cuneta actual.
A senda será de saburra estabilizada con cemento e para salvar o rego de Carballido contará cunha pasarela de madeira que xa está a ser instalada. Tamén está previsto reforzar a sinalización.
Arias afirmou que deste xeito mellórase a seguridade para os peregrinos e veciños que atravesen a pé esta zona da LU-530, a estrada que comunica Lugo coa Fonsagrada. Lembrou que ata o de agora a vía carecía dunha superficie específica para o tránsito dos peóns, o que os obrigaba a circular pola beiravía da marxe dereita e a cruzar a calzada en dúas ocasións.
Imaxes relacionadas
