A Xunta e os axentes sociais coinciden na importancia do desenvolvemento das enerxías renovables en Galicia para garantir a competitividade da industria

O vicepresidente primeiro e conselleiro de Economía, Industria e Innovación, Francisco Conde, participou esta tarde nunha nova xuntanza da Mesa do Diálogo Social, na que presentou os proxectos tractores cos que Galicia agarda obter fondos europeos. Un obxectivo para o que, coincidiron, será necesario o desenvolvemento das enerxías renovables que, á súa vez, garantirán a competitividade da industria.

Así, Conde trasladou á Confederación de Empresarios de Galicia (CEG) e aos sindicatos CCOO e UGT Galicia o impacto que proxectos como a fábrica de fibras téxtiles de Altri en Palas de Rei, a planta de hidróxeno verde de EDP e Reganosa nas Pontes, ou a planta de fertilizantes de Repsol, Naturgy e Reganosa en Meirama, poderían ter para toda Galicia. O vicepresidente económico tamén explicou que a Xunta está tramitando máis dunha trintena de proxectos que, de conseguir fondos europeos, suporían un importante paso para o progreso social e económico de Galicia.

No transcurso da xuntanza avaliáronse os obstáculos que as comunidades autónomas están tendo para impulsar proxectos susceptibles de captar fondos europeos. É necesario contar con maior axilidade e máis descentralización. Neste sentido, o Goberno central reservou para si o 100% dos fondos destinados á industria, o que limita a capacidade dos territorios. Tamén se explicaron as demandas que Galicia está realizando na planificación eléctrica e no desenvolvemento eólico, pois o eido enerxético está estreitamente vinculado coa competitividade industrial.

Con esta nova reunión, Galicia quere dar a este órgano unha presenza estable na axenda económica que se está desenvolvendo no contexto actual, por iso tamén propuxo á Mesa do Diálogo Social a súa integración na alianza industrial do hidróxeno verde.