A Xunta adxudica por preto de 1,8 M€ as obras destinadas a reducir o risco de inundación dos ríos Miñor e Zamáns, en Gondomar
As actuacións comezarán a inicios do vindeiro ano e terán un prazo de 12 meses
As bacías destes ríos forman parte dunha área de risco potencial de inundación, que a Xunta quere minorar con esta actuación prevista para colaborar co Concello
Intervirase no treito do río Miñor que vai desde a ponte da avenida do Conde de Gondomar ata Curros Enríquez; e no río Zamáns desde a ponte da avenida Elduayen ata a desembocadura no Miñor
Demolerase a ponte da avenida Curros Enríquez, construíndo unha máis ampla que resista mellor fronte ás enchentes e unha canle de alivio
Elevarase a altura do muro do río Zamáns e procederase ao rebaixe para eliminar o recheo xunto ao campo de fútbol, na marxe esquerda do río Miñor
Santiago de Compostela, 21 de novembro de 2022 A Xunta vén de adxudicar por preto de 1,8 millóns de euros as obras destinadas a reducir o risco de inundación dos ríos Miñor e Zamáns, no concello de Gondomar.
As actuacións, adxudicadas á UTE - Prace Servicios y Obras, S.A. - Francisco Gómez y CIA, S.L., comezarán a inicios do vindeiro ano e terán un prazo de execución de 12 meses.
As bacías dos ríos Miñor e Zamáns, en Gondomar, forman parte dunha área de risco potencial significativo de inundación, e a Xunta quere contribuír a minoralo mediante esta actuación que se vai executar no marco dun acordo de colaboración co Concello.
Para acadar este obxectivo, prevese acometer actuacións estruturais para mellorar a drenaxe na zona na que a confluencia dos ríos Miñor e Zamáns incrementa o risco das crecidas.
As intervencións enmárcanse na colaboración da Xunta co Concello de Gondomar, pola que a Administración autonómica se comprometeu a executar e financiar integramente as obras, mentres que o municipio asumiu o deber de poñer os terreos á disposición, un trámite que se demorou máis do previsto.
As obras executaranse no treito do río Miñor que vai desde a ponte da avenida do Conde de Gondomar -augas arriba do antigo colexio- ata a ponte da avenida Curros Enríquez; e no treito do río Zamáns que vai desde a ponte da avenida Elduayen ata a súa desembocadura no río Miñor.
A Xunta levará a cabo a demolición desa ponte da avenida Curros Enríquez, coa construción dun novo viaduto con máis amplitude que permita aumentar a capacidade de desaugue fronte ás enchentes; e a execución dunha canle de alivio baixo o novo viaduto, conectando os ríos Zamáns e Miñor.
Tamén se procederá á elevación da altura do muro do río Zamáns; ao rebaixe para eliminar o recheo xunto ao campo de fútbol, na marxe esquerda do río Miñor; e á limpeza das canles de ambos os dous ríos, á recuperación do bosque de ribeira ou á adecuación e mellora da zona do paseo Carlos Casares.