A Xunta licita por máis de 315.000 € o proxecto para humanizar unha nova rúa en Arbo para liberar o tráfico do centro urbano do concello
O Goberno galego destinará 8,6 M€ o vindeiro ano a seguir apoiando os concellos na execución deste tipo de obras, un 23 % máis que o orzamento destinado a tal fin en 2022
Santiago de Compostela, 20 de novembro de 2022 A Xunta de Galicia vén de licitar por máis de 315.000 euros o proxecto para humanizar unha nova rúa no Concello de Arbo para liberar o tráfico do centro urbano da localidade ao comunicar a rúa Vázquez Estévez e a estrada PO-400.
A maiores, tamén se levarán a cabo actuacións como demolicións, escavacións, recheos e rozas; renovacións de pavimentos; melloras nas redes de abastecemento, pluviais, alumeado ou telecomunicacións, e instalación de sinalización de mobiliario urbano.
Estas obras acometeranse ao abeiro do chamado plan Hurbe, un programa impulsado polo Goberno galego en 2010 co fin de axudar ás administracións locais a financiar este tipo de proxectos municipais que inciden de forma positiva na calidade de vida da veciñanza.
Desde entón, mobilizáronse ao redor de 163 millóns de euros para o financiamento de máis de 410 iniciativas urbanísticas en decenas de concellos galegos co fin de habilitar ou recuperar equipamentos públicos e poñer en valor as súas contornas urbanas. Ata o momento, só na provincia de Pontevedra están comprometidas ou xa executadas un total de 63 actuacións.
A Xunta destinará 8,6 millóns de euros o vindeiro ano a seguir apoiando os concellos na execución deste tipo de obras, un 23 % máis que o orzamento destinado a tal fin en 2022.