A Xunta de Galicia impulsa a mellora dos accesos ao parque empresarial de Outeiro de Rei cun apoio de máis de 114.000 €
A secretaria xeral de Industria, Paula Uría, visitou hoxe as actuacións, que se enmarcan dentro do traballo da Administración autonómica para mellorar e crear novas infraestruturas sostibles nas áreas industriais e impulsar a atracción de novos investimentos cara aos municipios galegos
Na provincia de Lugo concedéronse apoios a un total de seis proxectos, que supoñen un investimento de máis de 600.000 euros
Outeiro de Rei (Lugo), 15 de novembro de 2022 A secretaria xeral de Industria, Paula Uría, visitou esta mañá o parque empresarial de Outeiro de Rei con motivo da actuación de mellora das infraestruturas viarias levada a cabo co apoio da Xunta de Galicia. En concreto, a Administración galega achegou máis de 114.000 euros (o 80%) para un proxecto no que se investiron máis de 143.000 euros. O de Outeiro de Rei foi un dos 42 proxectos apoiados en Galicia para a mellora de infraestruturas en parques empresariais. En concreto, na provincia de Lugo concedéronse seis axudas, todas en concellos emprendedores, que supuxeron un investimento total de máis de 620.000€.
A actuación enmárcase no obxectivo da Xunta de mellorar e crear novas infraestruturas sostibles nas áreas industriais e impulsar a atracción de novos investimentos. Así, a Vicepresidencia primeira e Consellería de Economía, Industria e Innovación ofrece axudas tanto para este tipo de actuacións como para ampliar a rede de viveiros industriais e reforzar as infraestruturas enerxéticas. Tal e como avanzou a secretaria xeral, estes programas contan con 6,1M€ nos orzamentos para 2023.