Ángeles Vázquez salienta a importancia da Feira de Santos de Monterroso para poñer en valor o produto galego e o aproveitamento sostible dos recursos

A conselleira de Medio Ambiente, Territorio e Vivenda, Ángeles Vázquez, visitou está mañá a Feira de Santos de Monterroso, onde se achegou ata algún dos 850 postos de venda con produtos agrícolas e de horta, gandeiros e elaborados que desde onte, 31 de outubro, converten a este concello lucense no epicentro gastronómico de Galicia.

Acompañada polo delegado da Xunta en Lugo, Javier Arias, a conselleira incidiu na importancia que ten un evento deste tipo para o municipio, ao tratarse dun escaparate único para poñer en valor a produción de proximidade e o aproveitamento sostible dos recursos naturais que atesoura Galicia en xeral e a comarca da Ulloa en particular.

Neste sentido, cómpre subliñar que, tras dous anos marcados pola pandemia da Covid, se estima que a afluencia a esta nova edición do mercado de Monterroso supere as 20.000 persoas, unha cifra moi importante para un municipio de 3.500 veciños e que cada ano por estas datas atrae a visitantes procedentes de toda a Comunidade pola calidade e variedade dos queixos, castañas, carnes e doces que pon á venda.

Pola súa banda, o director xeral de Gandaría, Agricultura e Industrias Agroalimentarias, José Balseiros, enxalzou o labor dos gandeiros e dos agricultores galegos, así como das súas producións, para que a nosa comunidade sexa distinguida pola súa calidade no eido gastronómico.

De feito, a Feira de Santos de Monterroso está considerado un dos mercados rurais de produtos de temporada máis importantes e antigos de toda Galicia, xa que o seu nacemento remóntase a mediados do século XV. Por este motivo, no ano 2011 a Xunta decidiu declarala Festa de Interese Turístico de Galicia.