A Xunta participa no remate do proxecto “As influencias dos distintos camiños a Santiago na nosa indumentaria” levado a cabo no marco do programa O teu Xacobeo

Santiago de Compostela, 30 de outubro de 2022 A directora de Turismo de Galicia, Nava Castro, participou esta tarde no último desfile do proxecto “As influencias dos distintos camiños a Santiago na nosa indumentaria”, levado a cabo no marco do programa O teu Xacobeo.

Este proxecto deu lugar a cinco espectáculos, recollidos en diferentes concellos de Galicia polos que pasan os distintos Camiños de Santiago, nos que tiveron lugar conferencias sobre as influencias do camiño no noso traxe tradicional e mostras de 30 traxes, todos eles antigos ou fieis reproducións de traxes antigos.

Durante a súa intervención, a directora de Turismo de Galicia, Nava Castro, salientou o valor desta iniciativa mediante a cal amósase a importancia do Camiño de Santiago na modelaxe da nosa indumentaria tradicional, patrimonio inmaterial da nosa cultura, á vez que dan a coñecer a vestimenta que atopaban os peregrinos ao longo dos diferentes camiños no século XIX na súa viaxe a Compostela.

Neste senso, Castro incidiu na importancia dos diferentes traxectos polos que os peregrinos chegaron á Comunidade, provocando isto que prendas como os panos de Béjar, os mantóns de Manila ou o veludo francés formen parte da nosa indumentaria tradicional.

Este acto tivo lugar no marco do programa O teu Xacobeo, programa que apoiou 572 proxectos de máis de 200 concellos galegos que supuxeron un investimento da Xunta de 8 millóns de euros e permitiron mobilizar case 15 millóns de euros en ámbitos como o turismo, a cultura, o deporte ou a acción social.