Este proxecto foi abordado xa entre a conselleira de Infraestruturas e Mobilidade, Ethel Vázquez, e a alcaldesa, Cristina Correa, nunha reunión de traballo celebrada en setembro
A Xunta adxudica a redacción do proxecto de ampliación da plataforma da ponte da estrada PO-354 en Loureza, no concello de Oia
O obxectivo é definir a solución construtiva para a ampliación do treito da vía situado no punto quilométrico 9+070 e dotar a estrada autonómica de 2 carrís con beiravías
O contrato, cun investimento de preto de 18.000 €, avaliará a lo menos dúas alternativas para a mellora da funcionalidade e seguridade viaria neste treito da vía, que impide na actualidade o cruce de dous vehículos sobre a ponte
Analizarase a ampliación da plataforma cunha solución de novo taboleiro apoiado na infraestrutura existente, e o aumento do radio da curva previa á ponte
Tamén se avaliará a posibilidade de definir unha pequena variante do trazado da estrada PO-354 que evite o paso pola ponte actual
A Xunta segue a traballar na mellora das infraestruturas da rede viaria co fin de proporcionarlles unhas estradas máis seguras e eficientes aos cidadáns
Santiago de Compostela, 24 de outubro de 2022 A Xunta adxudicou a redacción do proxecto de ampliación da plataforma da ponte da estrada autonómica PO-354, en Loureza, no concello de Oia.
O contrato, adxudicado á empresa Ingenieros Consultores por importe de preto de 18.000 euros, ten como obxectivo deseñar a solución construtiva para a ampliación da plataforma da estrada PO-354 no seu punto quilométrico 9+070, e dotala dunha sección de 2 carrís con beiravías.
Este proxecto foi abordado xa nunha reunión de traballo celebrada en setembro entre a conselleira de Infraestruturas e Mobilidade, Ethel Vázquez, e a alcaldesa, Cristina Correa.
Ese punto da vía autonómica, en Loureza, sofre un estreitamento moi importante da súa sección, ao axustarse ao ancho da obra de paso de fábrica. A plataforma da vía conta con 4 metros de ancho e non se poden cruzar dous vehículos sobre a ponte, o cal supón un problema de funcionalidade e de seguridade viaria. Este problema vese incrementado, ademais, polo abrupto da curva anterior ao dito estreitamento.
Así, o obxectivo do contrato adxudicado é realizar un estudo previo que analice a viabilidade de, cando menos, dúas alternativas.
Por unha banda, analizarase a posibilidade de ampliación da plataforma da ponte mediante unha solución de novo taboleiro apoiado na fábrica existente e o aumento do radio da curva previa á ponte.
Doutra banda, avaliarase tamén a posibilidade de definir unha pequena variante do trazado da PO-354 que evite o paso pola actual ponte.
Unha vez definida a solución máis acaída, desenvolverase a intervención a nivel construtivo, obténdose como resultado un treito de estrada PO-354 coa plataforma ampliada a unha sección de 2 carrís con beiravías neste treito obxecto da actuación.
No desenvolvemento do proxecto prepararase tamén a documentación para poder proceder á expropiación de terreos precisos para execución das obras.
A Xunta continúa traballando pola mellora da rede viaria autonómica co fin de proporcionarlles unhas estradas máis seguras e eficientes aos cidadáns.
Imaxes relacionadas
