A Xunta adxudica o proxecto para instalar 34 bancos públicos en preto dunha trintena de aldeas do concello de Montederramo
A actuación enmárcase no plan Hurbe específico que a Consellería de Medio Ambiente, Territorio e Vivenda está a desenvolver na Ribeira Sacra
Santiago de Compostela, 22 de outubro de 2022 A Xunta de Galicia vén de adxudicar o proxecto para mellorar os equipamentos públicos dunha trintena de núcleos rurais do municipio, cun investimento total previsto de máis de 25.000 euros.
A intervención consistirá no subministro e instalación dun total de 34 bancos de madeira tratada contra a couza, termitas e insectos en 28 aldeas do concello: Gabín, Os Abeledos, Cacharrequille, Vigueira de Arriba, Mazaira, Valdarias, Touzal, A Mogaínza, Paredes, As Corraínzas, O Regueiro, O Outeiro, Os Pereiros, Valderrique, Santiago da Medorra, A Graña, San Fitoiro, Vigueira de Abaixo, Ferrón, A Retorta, Moás, Vila Pequena, Veducedo, Cascarballo, A Xestosa, A Mioteira, A Reguenga e Vilariño Pequeno.
Con esta actuación, para a que a Xunta aportará o 70% do financiamento e o Concello o 30% restante, búscase elevar o actual nivel de servizos á disposición da veciñanza de Montederramo co fin de promover o seu benestar e incrementar o atractivo e a humanización dos referidos núcleos e da praza do concello.
A participación da Xunta neste proxecto enmárcase no seu compromiso á hora de brindar apoio económico ás entidades locais para promover actuacións que, como esta, contribúen a dinamizar as vilas galegas e mellorar a calidade de vida dos cidadáns reforzando os equipamentos públicos.
Cómpre lembrar, ademais, que esta intervención se enmarca no plan Hurbe específico para a Ribeira Sacra. Trátase dunha das 10 medidas incluídas dentro do Plan de acción estratéxico para esta zona que aprobou en 2019 a Consellería, co fin de impulsar actuacións por 4,5 millóns de euros para mellorar a súa planificación e protección a nivel paisaxístico, urbanístico e ambiental.