A conselleira de Medio Ambiente, Territorio e Vivenda visitou hoxe o concello da Illa de Arousa
A Xunta presenta a orde que establece os usos permitidos no illote Areoso e regula por primeira vez o acceso diario de embarcacións e persoas
Ángeles Vázquez salienta a necesidade de garantir a conservación dos hábitats e das especies de flora e fauna silvestre que atesoura este conxunto de illotes
En tempada alta permitiranse ata 20 fondeos e 50 persoas por cada unha das quendas -mañá e tarde-, mentres que en tempada baixa o límite será de 10 fondeos e 20 persoas
Prohíbese a acampada, a caza e pesca recreativa, así como o emprego de aparellos de son que perturben o hábitat
O documento someterase a exposición pública para recibir achegas a partir do día 18 de outubro e ata o 8 de novembro co obxectivo da súa posible entrada en vigor a vindeira Semana Santa
A Illa de Arousa (Pontevedra), 15 de outubro de 2022 A conselleira de Medio Ambiente, Territorio e Vivenda, Ángeles Vázquez, presentou hoxe a orde que establece os usos permitidos no arquipélago dos Guidoiros e da illa da Rúa e regula por primeira vez o acceso diario de embarcacións e persoas.
A maiores, tamén se regula o atraque de embarcacións relacionadas coas actividades de uso público nos illotes, que deberá efectuarse sobre o medio litoral para preservar os hábitats e as especies. O número de autorizacións oscila entre as 10 e as 12 embarcacións por quenda en función de se a embarcación ten motor ou non en tempada alta mentres que en tempada baixa o límite estará en 5 embarcacións por quenda.
Usos e actividades prohibidos
No que respecta aos usos e actividades que se prohiben, a conselleira salientou a acampada; a caza e a pesca recreativa ou deportiva; a recolección de especímenes e mostras biolóxicas, animais e plantas; a práctica do botellón e o lume; o emprego de aparellos de son que perturben a tranquilidade do hábitat, e calquera modalidade de publicidade exterior.
Para concluír, Ángeles Vázquez indicou que este documento se someterá a información pública e audiencia aos interesados desde o vindeiro martes, 18 de outubro, ata o 8 de novembro, co obxectivo de que entre en vigor a vindeira Semana Santa.