A Xunta remata as obras de acondicionamento da estación de autobuses de Ponteareas, mellorando a accesibilidade peonil á terminal e os servizos aos usuarios
A intervención, que supuxo un investimento de preto de 50.000€, abre o acceso peonil ás dársenas desde a rúa, sen barreiras arquitectónicas
A intervención tamén incluíu unha nova rede de saneamento para os baños, a reparación da instalación eléctrica da estación, a rede de fontanería ou o lucernario interior
Procederase ao pintado interior de paramentos verticais, á limpeza da planta inferior da área de intervención e á reparación de elementos deteriorados
A Xunta está a xestionar a estación de autobuses de Ponteareas de forma temporal, mediante un contrato para a explotación e outro para a limpeza
Esta situación manterase ata que comece a operar o novo concesionario da terminal, que tamén xestionará as estacións de Vigo, de Cambados e de Cangas
A nova xestión está supeditada á apertura da nova estación de autobuses de Vigo, rematada en xuño de 2021 e á espera de que o Concello de Vigo habilite o acceso
A Xunta rematou as obras de acondicionamento da estación de autobuses de Ponteareas, mellorando a accesibilidade peonil á terminal e os servizos aos usuarios.
A Consellería de Infraestruturas e Mobilidade, a través da Dirección Xeral de Mobilidade, unha vez asumida a xestión temporal desta terminal e dado o deterioro que presentaban as instalacións, asumiu a execución de diferentes actuacións de mellora da infraestrutura. Esta nova actuación supuxo un investimento autonómico de preto de 50.000 euros.
A intervención comprendeu traballos como a apertura de acceso peonil ás dársenas desde a rúa, sen barreiras arquitectónicas.
Tamén se acometeu unha nova rede de saneamento nos baños, en substitución da actual; o reforzo da soleira de soporte na calzada de saída dos autobuses; ou a substitución de bancadas de espera deterioradas.
Os traballos tamén incluíron a reparación da instalación eléctrica da estación, da rede de fontanería ou do lucernario interior.
Ademais procedeuse ao pintado interior de paramentos verticais, á limpeza da planta inferior da área de intervención e á reparación de papeleiras, tulipas de luminarias e outros elementos deteriorados.
A Xunta está a xestionar a estación de autobuses de Ponteareas, de forma temporal, mediante un contrato para a explotación e outro para a limpeza.
Dadas as deficiencias que presentaban as instalacións no momento da cesión por parte do Concello, o Goberno galego determinou a execución destes traballos co fin de mellorar a terminal e ofrecer mellores servizos aos usuarios.
O contrato temporal de xestión estará en servizo ata que entre a operar o novo concesionario da terminal, que xestionará conxuntamente as estacións de Vigo, de Cambados, de Cangas e de Ponteareas.
O inicio deste contrato está supeditado á apertura da nova estación de autobuses de Vigo, rematada en xuño de 2021 e á espera de que o Concello de Vigo habilite os accesos á estación.
Imaxes relacionadas
