A Xunta construirá unha pasarela peonil na ponte sobre o rego Val dos Gozos en Cudeiro, no concello de Ourense

A Consellería de Infraestruturas e Mobilidade adxudicou por máis de 18.000 € o contrato para a redacción do proxecto de construción dunha pasarela peonil na estrada autonómica OU-150  no núcleo de Cudeiro, no concello de Ourense.

Este contrato foi adxudicado á empresa Deseños Estruturais e Viarios, S.L., que conta cun prazo de 8 meses para a redacción do proxecto que dotará o treito da ponte sobre o rego Val dos Gozos dun itinerario diferenciado para o transito peonil, do que carece na actualidade.

A Xunta vai iniciar nos vindeiros días as obras de construción dunha senda na OU-101, en Montealegre, e na estrada OU- 150, en Valdorregueiro, impulsando un itinerario peonil seguro e accesible en cada unha destas sendas.

No caso concreto da estrada OU-150, en Valdorreguerio a senda en execución na marxe dereita remata xusto antes da ponte sobre o rego Val dos Gozos; e na outra marxe da conca existe unha beirarrúa, tamén na marxe dereita da estrada, que discorre ata o seguinte núcleo de Cudeiro.

Os traballos obxecto deste novo contrato teñen como obxectivo acadar un itinerario continúo a ambas as dúas marxes da ponte sobre o rego Val dos Gozos, para o que se definirán as actuación necesarias para conectar os dous itinerarios peonís mediante unha pasarela duns 60 m de lonxitude, tamén na marxe dereita.

Na redacción do proxecto construtivo da pasarela deberá terse en conta as prescricións sectoriais en materia de augas e de patrimonio cultural, entre outras de ser o caso. Tamén a necesidade de proceder á expropiación de terreos para a súa execución.

O departamento que dirixe Ethel Vázquez segue mellorando a rede viaria autonómica para favorecer os desprazamentos a pé de modo máis seguro e sustentable.