Ethel Vázquez salienta que as obras de mellora da seguridade viaria da estrada Valdoviño-Cedeira permitiron acurtar nun 30% o tempo de percorrido grazas a un investimento da Xunta de 4,7 M€

A conselleira de Infraestruturas e Mobilidade, Ethel Vázquez, salientou hoxe que as obras de mellora da seguridade viaria da estrada Valdoviño-Cedeira permitiron acurtar nun 30% o tempo de percorrido grazas a un investimento da Xunta de 4,7 M€.

Vázquez Mourelle, xunto coa delegada territorial da Xunta en Ferrol, Martina Aneiros, supervisou en Valdoviño o resultado da reforma da AC-566, en case 4 quilómetros da estrada, desde a saída do núcleo urbano de Valdoviño ata A Ramalleira, que permite mellorar de forma “moi significativa” as comunicacións do norte da comarca de Ferrolterra.

A titular de Infraestruturas e Mobilidade explicou que esta era unha actuación moi demandada polos veciños e visitantes, ao ser esta unha estrada pola que circulan de media 5.000 vehículos ao día, transitada especialmente no verán, pola riqueza natural, polo atractivo turístico e pola intensa actividade deportiva na zona de Pantín.

Para a súa mellora, executáronse dous tipos de actuación entre os quilómetros 13 e 17 da AC-566. A conselleira concretou que, nunhas zonas, as obras consistiron no ensanche da vía e no reforzo do firme e, naqueles treitos onde se considerou necesario, acometeuse unha intervención de maior calado, mediante a rectificación das curvas e o aumento da sección transversal da estrada para habilitar un carril adicional.

Neses puntos nos que se habilitou un carril adicional, ampliouse a plataforma ata conseguir unha sección total de 10 metros, para aloxar os dous carrís de circulación de 3,5 metros, ademais das beiravías e os elementos de drenaxe.

A conselleira apuntou á importante mellora acadada na circulación viaria entre Valdoviño e Cedeira, porque nesta zona, ademais das complicacións que supuñan as curvas tan pechadas, non existía posibilidade de adiantamento.

A intervención tamén incluíu a reforma de interseccións, habilitáronse cambios de sentido e facilitáronse aqueles xiros á esquerda que reúnen as condicións de seguridade obrigadas.

Segundo subliñou Ethel Vázquez, con esta actuación, o Goberno galego cumpre cun compromiso cos municipios de Valdoviño e de Cedeira, ademais de avanzar na materialización das actuacións programadas para a mellora da rede viaria das comarcas de Ferrolterra, Eume e Ortegal.

Fixo fincapé no cumprimento da Xunta coa folla de ruta comprometida, estando xa mellorada a estrada do Porto de Bares, en Mañón, e rematado tamén o acondicionamento da AC-110 nas Somozas. 

Avanzou que neste outono se culminará a 1ª fase da mellora da capacidade e seguridade da AC-862 en San Sadurniño, unha intervención na que a Xunta está a investir 7,2 M€.

Paralelamente, estase a tramitar o proxecto da 2ª fase, a do treito comprendido entre o Campo do Hospital e Ponte Mera, en Ortigueira, que se agarda poder licitar proximamente e que suporá un investimento de 7,5 M€.

En definitiva, dixo, a Xunta está a traballar de forma moi intensa na mellora das comunicacións das comarcas de Ferrolterra, Eume e Ortegal, co obxectivo de reforzar a competitividade e as oportunidades de progreso dotándoas de mellores conexións como esta estrada renovada entre Valdoviño e Cedeira.