A Xunta dotará ao polígono residencial de Valdecorvos, en Pontevedra, dun novo centro de transformación eléctrico para reforzar o servizo
A empresa pública Xestur investirá preto de 124.000 euros na súa construción
O Instituto Galego da Vivenda e Solo licitou en xullo a redacción do proxecto para a construción de 76 vivendas de promoción pública nunha parcela deste ámbito
A Xunta de Galicia investirá preto de 124.000 euros nun centro de transformación e rede de baixa tensión para o polígono residencial de Valdecorvos, en Pontevedra, que se licitará en breve.
Este investimento permitirá reforzar o servizo eléctrico deste ámbito unha vez que a meirande parte das parcelas están xa adxudicadas para a construción de vivendas de promoción pública (VPP).
Actualmente a Xunta conta con dúas parcelas dispoñibles, que serán incluídas no próximo concurso de adxudicación de solo residencial. Trátase das parcelas 14 e 17, que permitirán a construción de 56 e 48 vivendas protexidas, respectivamente.
Por outra parte, o Instituto Galego da Vivenda e Solo (IGVS) licitou o pasado mes de xullo, cun orzamento base de 646.692,79 euros, a redacción do proxecto de construción e a dirección de obra de 76 VPP que construirá na parcela 16 de Valdecorvos.