Galicia leva os produtos do mar ás principais feiras sectoriais mundiais ata finais de ano para mostrar a súa excelencia e impulsar as exportacións

A conselleira do Mar, Rosa Quintana, visitou hoxe na cidade alemá de Bremen ás empresas galegas da cadea mar-industria que participan estes días na Fish International para apoiar ao sector pesqueiro, marisqueiro, acuícola e transformador no seu obxectivo de abrir novas vías de negocio en mercados emerxentes e potenciar a demanda de produto galego, aportándolle máis valor engadido.

Así, no seu afán por mellorar a comercialización e distribución dos produtos do mar, a Xunta de Galicia estará presente no que resta de ano nun total de sete certames, entre os que se inclúe esta feira de Bremen, así como a Seafood Expo Asia (en Singapur, do 14 ao 16 de setembro), Expomar Mindelo (Cabo Verde, do 29 ao 30 de setembro) ou a SIAL 2022 (Francia, do 15 ao 19 de outubro). Ademais, a presenza nacional tamén terá especial importancia a través de eventos como o Fórum Gastronómico da Coruña (do 25 ao 27 de setembro), Conxemar en Vigo (do 4 ao 6 de outubro) e Xantar en Ourense (do 9 ao 13 de novembro).

Con esta participación, a Consellería do Mar pretende avanzar na internacionalización do sector marítimo-pesqueiro galego así como aumentar os seus ingresos económicos e impulsar a xeración de emprego. Así mesmo, impúlsanse as campañas de promoción dos produtos pesqueiros para potenciar o seu consumo, unha práctica que repercute na mellora da saúde dos cidadáns polas súas achegas nutritivas e o seu baixo aporte calórico.

Do mesmo xeito, este tipo de iniciativas supoñen un punto de encontro no caso de clientes consolidados, ao tempo que facilitan a posibilidade de mostrar os avances e tendencias relacionadas co sector, o que deriva na captación de clientes e na asimilación de novas ideas de traballo de cara ao seu futuro.

Neste sentido, a Xunta e as empresas galegas participaron noutras seis feiras no que vai de ano para afianzar os seus lazos comerciais con importadores de todo o mundo, un fito moi importante despois do parón provocado pola pandemia da covid-19. Así, a comunidade estivo presente na Seafood Expo North América de Boston; no Aquafuture Spain 2022 (Pontevedra); en Alimentaria 2022 (Barcelona); o Salón Gourmets (Madrid); en Navalia (Vigo); e en Salimat-Abanca (Pontevedra).

Coa normalidade expositiva recuperada neste 2022, a Consellería do Mar prevé asistir en todo o ano a un total 13 feiras nacionais e internacionais –tendo en conta a opinión e intereses das propias empresas á hora de seleccionar os destinos–, cun investimento de arredor de 2,6 millóns de euros. A Xunta asiste a estas feiras cun stand propio e ofrece ás firmas galegas participar como coexpositoras ou a través dun centro de negocios para aumentar a súa visibilidade.

Fish International

A feira Fish International de Bremen, que se celebra desde onte e ata mañá, ten carácter bienal e constitúe un gran escaparate europeo para os profesionais e empresas do sector que amosan as súas últimas novidades, ao ofrecer catro áreas expositivas –produtos, packaging, tecnoloxías e servizos do produtos ao consumidor– ademais dun completo programa de eventos.

A Consellería do Mar está presente neste evento cun posto que conta con 180 metros cadrados de superficie de zona expositiva e que alberga a nove empresas coexpositoras: Conxelados Noribérica, Copemar, Grupo Ibérica de Conxelados, Conxelados Videmar, Marfrio, Frioantartic, Grupo Profand, Pasteurizados Cíes e Fandicosta.