A Xunta apoiará a mobilidade xeográfica das vítimas da violencia de xénero por motivos de traballo con achegas que poderán superar os 10.000 euros

O Diario Oficial de Galicia publica hoxe unha nova convocatoria de axudas para apoiar ás mulleres traballadoras vítimas da violencia de xénero que se ven obrigadas a mudar a súa residencia habitual de localidade por motivos laborais a causa da súa situación. Contarán así con achegas, que poden superar os 10.000 euros, coas que se pretende cubrir parte das necesidades de transporte, aloxamento, mudanza e coidados de menores e dependentes que lles xurdan.

A Xunta de Galicia pretende con esta medida prestar un apoio económico máis a estas persoas e apoialas no comezo dunha nova vida ou situación libre de violencia.

Poden beneficiarse das axudas as mulleres que teñan acreditada a súa condición de vítimas de xeito oficial nos 24 meses anteriores ao cambio de residencia efectuado entre o 1 de xaneiro de 2020 e o 30 de novembro de 2022. As vítimas deberán ter cesado a relación de convivencia co agresor e a media dos seus ingresos brutos mensuais non poderán superar 3,5 veces o Indicador Público de Renda de Efectos Múltiples (Iprem) dos seis meses anteriores á data de solicitude.

Galicia é das poucas comunidades que conta con axudas deste tipo, inseridas, no seu caso, nas medidas que a comunidade ten en marcha no marco do Pacto de Estado contra a violencia de xénero. É ademais a primeira en estender este tipo de apoios ás mulleres que padecen violencia vicaria, é dicir, é exercida contra os seus fillos e/ou familiares directos co obxecto de prexudicalas. 

Entre os gastos financiables no marco da resolución que hoxe se leva a DOG, a Xunta inclúe o desprazamento tanto da beneficiaria como dos familiares ao seu cargo desde a localidade de orixe á nova residencia. Darase cobertura ao importe dos billetes, no caso de empregar liñas regulares de transporte público, e tamén ao custo polo emprego do vehículo particular, de ser o caso, cunha indemnización por quilómetro e polo importe das peaxes debidamente xustificadas.

Os apoios destinaranse ademais a atender gastos derivados do traslado de mobiliario de enseres ata un máximo de 2.316 euros (4 veces o Iprem actual). Tamén os de aloxamento, na súas modalidades de alugueiro ou adquisición de nova vivenda no novo destino; ou de hospedaxe da beneficiaria e das persoas integrantes da unidade familiar durante os primeiros doce meses de traballo ata un máximo de 5.790 euros (10 veces o Iprem).

O Goberno galego ten en conta tamén que coa mobilidade xeográfica, as mulleres poden ter que enfrontar gastos atención a menores ou persoas dependentes ao seu cargo, que compensará con contías máximas de 2.316 euros (4 veces o Iprem).

O prazo de solicitude ábrese mañá e permanecerá vixente ata o próximo 30 de novembro.

Apoios económicos ás vítimas

Con esta liña de achegas, a Xunta está a destinar este ano máis de 6,5 millóns de euros a apoiar economicamente ás vítimas da violencia de xénero.

A comunidade é referente ao ofrecer unha prestación periódica de ata 800 euros mensuais ás mulleres vítimas durante un ano. Desde 2009 máis de 5.300 vítimas se acolleron a esta medida.

A Xunta ten aberta de xeito ininterrompido a convocatoria de pagamentos únicos de ata 10.846€ para axudar as vítimas que pola súa idade ou outras circunstancias, presenten especiais dificultades para obter un emprego que garanta a súa integración social. Nos últimos doce anos chegaron a máis de 1.300 beneficiarias.

O Goberno galego reserva ademais 55.000 euros para garantir que as vítimas que teñen recoñecida unha indemnización por sentenza dos tribunais galegos, a reciban; e outros 70.000 para achegas directas a orfas e orfos das vítimas mortais e para as mulleres que resultan gravemente feridas durante as agresións.