A Xunta colabora na celebración da IV edición ‘Arousa Inspira’ a través do programa iniciativa Xove

A Xunta colabora no desenvolvemento da IV edición do festival Arousa Inspira a través do programa Iniciativa Xove. Este evento, impulsado pola asociación xuvenil Arousa Moza, ten como obxectivo dar a coñecer o patrimonio propio e dar visibilidade ao talento mozo da comarca. A directora xeral de Xuventude, Participación e Voluntariado, Cristina Pichel, asistiu hoxe á rolda de prensa da asociación para presentar o programa no Espazo Xove de Vilagarcía.

No marco deste festival, os voluntarios levan a cabo xincanas infantís para nenos e nenas así como concertos e espectáculos de artistas da comarca. Baixo o lema Non hai fronteiras, a asociación desenvolve un programa de actividades cun enfoque multicultural e tolerante. Ademais, por primeira vez, o festival terá lugar tanto no concello de Vilanova de Arousa como de Vilagarcía. Dentro da programación, tamén se inclúen os certames de fotografía e poesía para fomentar a creatividade dos máis novos.

A directora xeral lembrou que a través do programa Iniciativa Xove, a Xunta de Galicia ofrece recursos económicos á xuventude para levar a cabo iniciativas que lle permitan facer realidade os seus proxectos. Así mesmo, apuntou que a semana pasada saíu publicada a resolución no Diario Oficial de Galiciano que se concretan os beneficiarios da última convocatoria de axudas. Trátase de 85 novos proxectos de asociacións xuvenís e grupos informais.

Axudas de ata 5000 euros

Desde a posta en marcha de Iniciativa Xove, no ano 2010, o Goberno galego destinou máis de 6 millóns de euros a axudar á mocidade galega a impulsar 1600 proxectos. A convocatoria deste ano conta cun orzamento de 400.000 euros que permite que as asociacións xuvenís ou grupos informais accedan a unha axuda de ata 5000 euros para iniciar novos proxectos.