A Xunta formaliza a adxudicación de cinco parcelas de máis de 108.000 metros cadrados na Plisan

Santiago de Compostela, 29 de xullo de 2022

A Xunta, a Autoridade Portuaria de Vigo e o Consorcio da Zona Franca veñen de asinar, esta mañá, as escrituras polas que se adxudican formalmente 5 parcelas –un total de 108.544,48 m2- na plataforma loxístico-industrial de Salvaterra-As Neves (Plisan) ás empresas Lonza Biologics Porriño, S.L. e aos Centro Logístico Plisan, S.L.

A empresa Lonza Biologics Porriño, S.L. asinou as escrituras de adxudicación de catro parcelas, cunha superficie total de 101.899,61 m2, valoradas en máis de 5,4 millóns de euros. A adxudicación realízase en forma de dereito de superficie, polo que a empresa pagará un canon de menos de 0,80 euros por m2 e ano, que supón un total de 81.331,17 euros anuais os dous primeiros anos. A empresa destinará as parcelas a un centro produtivo de produtos farmacéuticos.

Pola súa banda, o Centro Logístico Plisan S.L. asinou as escrituras de adxudicación dunha parcela de 6.644,87 m2, valorada en preto de 0,48 millóns de euros. Como no caso anterior, a adxudicación tamén se realiza en forma de dereito de superficie, polo que a empresa pagará un canon de menos de 1,08 euros por m2 e ano, que supón un total de 7.147,55 euros anuais os dous primeiros anos. A actividade á que destinará a parcela é ao envasado e conservación en frío de alimentos frescos como pescado, marisco, cefalópodos, carne, vexetais, alimentos precociñados e sobremesas.

A adxudicación en dereito de superficie permite ás empresas acceder ao solo a cambio do pago cada ano dunha cantidade reducida por metro cadrado, o que facilita financiar a súa instalación e o inicio da actividade. En concreto, o canon anual a abonar equivale ao 1,5% do prezo da parcela durante os dous primeiros anos, ao 2,5% nos anos terceiro e cuarto, e ao 3,5% do prezo a partir do quinto ano.

En todo caso, os adxudicatarios teñen tamén a opción de adquirir a propiedade da parcela en condicións vantaxosas nos anos seguintes á adxudicación, con dereito a bonificacións e descontando do prezo de venda unha porcentaxe das cantidades xa satisfeitas.

Actualmente, na Plisan están adxudicados 220.288,56 m² de solo empresarial, ao sumarse ás parcelas escrituradas hoxe ás adxudicadas con anterioridade ás empresas Hijos de Carlos Albo, Grupo Tecnológico Arbinova e Frinsa del Noroeste S.A. Isto supón que está adxudicado máis de 62 por cento do solo xa urbanizado na PLISAN.