A Xunta atendeu a preto de 11.000 maiores nos servizos gratuítos de estimulación da memoria, podoloxía e audioloxía do programa Coidados porta a porta

A Xunta leva atendido a preto de 11.000 persoas maiores a través do programa Coidados porta a porta que iniciou o pasado mes de marzo o seu percorrido por toda Galicia ofrecendo servizos gratuítos de estimulación da memoria, podoloxía e audioloxía.

O programa conta con oito unidades móbiles que percorrerán os 313 municipios de Galicia, agás as sete cidades. Polo momento, leva percorridos 154 concellos nos que permaneceu durante varios días. O programa está destinado a persoas maiores de 55 anos e ten como obxectivo achegar servizos de atención para que os usuarios non teñan que trasladarse quilómetros de distancia para acceder a eles.

En concreto, este programa atendeu neste tempo a preto de 3.000 persoas na provincia da Coruña, 2.700 na de Lugo, 2.300 na de Ourense e 3.000 na de Pontevedra. A iniciativa contou cunha experiencia piloto no ano 2019 que tivo moi boa acollida por parte dos concellos e das persoas maiores. Por iso, neste ano 2022 recuperouse o seu funcionamento e ampliouse a súa extensión.

Cita previa

Para ser atendido en calquera dos autobuses do programa, que continuarán percorrendo toda Galicia, é necesario solicitar cita previa nos teléfonos 622 748 283 ou 623 546 992, ou no correo electrónico coidadosportaaporta.politicasocial@xunta.gal.

Ao longo da vindeira semana este programa chegará aos concellos de Cerceda, Trazo, Palas de Rei, Guntín, Vilanova de Arousa, A Illa de Arousa, Pereiro de Aguiar, Paderne de Allariz, Arteixo, Boimorto, Cuntis, Maceda, Baños de Molgas, Tordoia, Toques e Ribadumia.