A Xunta convoca o bono de alugueiro social, que poderán pedir desde mañá os colectivos vulnerables para cubrir o 100% do custo da súa vivenda habitual

O bono de alugueiro social poderá solicitarse a partir de mañá en Galicia despois de que hoxe mesmo saíra publicada no DOG a resolución pola que se establecen as bases reguladoras destas axudas e se procede á súa convocatoria.

Deste xeito, a Xunta seguirá asumindo o 100% do importe do arrendamento das persoas beneficiarias, colectivos vulnerables e persoas con escasos recursos económicos e que, polo tanto, poder ter dificultades para manter a súa vivenda habitual.

A principal novidade recollida na resolución é que, por primeira vez, se prevé a posibilidade de incrementar nun 20% a contía máxima da renda de alugueiro e polo tanto, do bono, cando a unidade de convivencia do solicitante estea composta por 5 ou máis persoas. Tamén se aplicará esta mesma porcentaxe se un dos membros da unidade familiar precisa dunha vivenda adaptada.

Na práctica, isto traducirase en que a contía máxima do Bono de alugueiro social se incrementará ata os 660 euros ao mes fronte aos 540 euros fixados como contía límite das axudas na convocatoria anterior.

O Bono de alugueiro social concederase por un período de 12 meses consecutivos, aínda que poderán pedirse ata 4 prórrogas. Deste xeito, os beneficiarios terán dereito a percibir esta axuda ao alugueiro durante un total de 5 anos, como máximo.

Case 15 M€ en 5 anos

Cun orzamento inicial de 11,2 millóns de euros para todo o período, a convocatoria do Bono de alugueiro social faise de forma continuada e permanente ata 2026 ou ata o esgotamento do crédito dispoñible. Así mesmo, destinaranse 3,7 millóns de euros ás prórrogas de concesións anteriores para garantir e atender a estes beneficiarios nas mesmas condicións que fixa o novo programa.

Deste xeito, a Xunta mobilizará a través do Bono de alugueiro social case 15 millóns de euros para atender as necesidades residenciais de familias galegas vulnerables durante os vindeiros 5 anos.

O obxectivo deste programa —impulsado en 2015 e que ata agora permitiu axudar a unhas 2.000 familias con recursos limitados— é facilitar un fogar en alugueiro a determinados colectivos desfavorecidos, como afectados por unha demanda de desafiuzamento ou un procedemento de execución hipotecaria, vítimas de violencia de xénero e mulleres que sofren trata con fins de explotación sexual, persoas privadas do seu fogar por causas sobrevidas ou que se atopen en situación de emerxencia social, e mozos tutelados pola Xunta unha vez acaden a maioría de idade, entre outros.

Para poder acceder a estes incentivos, os solicitantes deberán acreditar que os ingresos da unidade de convivencia son inferiores a 1,5 veces o Iprem ponderado —12.159.42 euros—. Esta contía irá incrementándose en función do número de membros da familia e doutras circunstancias particulares, ata acadar, como máximo, os 20.265,7 euros anuais.

Co fin de paliar este tipo de situacións e axudar a colectivos vulnerables a conservar o seu fogar, os beneficiarios do bono terán dereito a recibir unha prestación equivalente á totalidade da renda que figure no seu contrato, sempre que esta non supere o límite fixado polo Instituto Galego da Vivenda e Solo para cada zona xeográfica.

Deste xeito, nas 7 grandes cidades o importe a pagar será de, como máximo, 550 euros ao mes; nos concellos de tamaño medio e localizados en contornas urbanas, estará fixado en 500 euros; e no resto de municipios, o límite será de 425 euros.

En todo caso, como xa se indicou, estas contías incrementaranse nun 20% cando a unidade de convivencia do beneficiario necesite dispoñer dunha vivenda adaptada ou estea integrada por 5 ou máis membros. Nestes supostos, polo tanto, o importe da axuda poderá chegar ata os 660, 600 ou 510 euros respectivamente e segundo a zona.

Ademais, os perceptores desta prestación poderán recibir unha axuda complementaria de ata 600 euros destinada a pagar os gastos asociados á constitución dun novo contrato de alugamento —fianza, alta de subministros, etc.— ou ben no caso de permanecer na vivenda obxecto de desafiuzamento, a atender as cantidades pendentes que motivaron o inicio do procedemento.