A conselleira de Política Social e Xuventude, Fabiola García, visitou hoxe o centro que pertence á rede pública autonómica

A Xunta inviste preto de 550.000 euros na renovación da escola infantil Antela, en Ourense

Esta importante actuación permitirá a substitución de toda a cuberta e a renova-ción da fachada para garantir a comodidade de usuarios e profesionais e mellorar o illamento e a eficiencia enerxética

1 de 4
2 de 4
3 de 4
4 de 4

O Goberno galego aposta pola conciliación e a etapa educativa de 0-3 anos a través da posta en marcha de 95 casas niño no rural e axudas como a Tarxeta Benvida ou o Bono Coidado

O vindeiro curso 2022-23 todas as escolas infantís serán gratuítas, unha medida que beneficiará a máis de 30.000 familias de toda Galicia das que 3.000 son da provin-cia de Ourense
 

Ourense, 6 de xullo de 2022

A Xunta sacou a licitación as obras na escola infantil pública autonómica Antela, na cidade de Ourense, por un investimento de preto de 550.000 euros. A conselleira de Política Social e Xuventude, Fabiola García, visitou hoxe as instalacións deste centro onde apuntou que esta importante actuación ten como obxectivo mellorar a comodidade dos seus usuarios e profesionais.

Fabiola García concretou que se substituirá toda a cuberta e renovarase a fachada para garantir tamén un maior illamento do centro e a súa eficiencia enerxética. O pasado ano xa se levaron a cabo actuacións para mellorar a súa accesibilidade. Neste sentido, lembrou que a conciliación e a atención á etapa educativa de 0-3 anos é unha prioridade para o Goberno galego, como se vén demostrando nos últimos anos.
 
A conselleira sinalou que neste tempo puxéronse en marcha 95 casas niño, a maioría na provincia de Ourense, para facilitar a conciliación nos pequenos concellos do rural; tamén se impulsou o Bono Coidado que axuda a máis de 1.000 familias a contratar un servizo extraordinario de conciliación; a Tarxeta Benvida que ofrece unha axuda directa de entre 1.500 e 3.000 euros ao ano a máis de 70.000 galegos para facer fronte aos gastos do seu fillo; e a aprobación da gratuidade das escolas infantís para segundos fillos e sucesivos que se ampliará aos primeiros o vindeiro curso.

Gratuidade das escolas infantís

Sobre esta medida, puxo en valor que no vindeiro curso académico 2022-23 Galicia converterase na primeira comunidade en facer gratuítas todas as escolas infantís, tanto as públicas autonómicas, como as privadas, as de iniciativa social e as municipais. Unha medida que beneficiará a máis de 30.000 familias de toda Galicia das que máis de 3.000 están na provincia de Ourense.

Imaxes relacionadas

Xuventude
Departamento:
C. de Política Social e Igualdade