A Xunta lanza a campaña #Igualdadefollowers con 17 influencers que empregarán o efecto multiplicador das redes sociais para sensibilizar sobre a igualdade

A conselleira de Promoción do Emprego e Igualdade, María Jesús Lorenzana, presentou hoxe unha nova edición da campaña #igualdadefollowers, na que a Xunta, un ano máis, recurrirá ao efecto multiplicador das redes sociais e a persoas con influenza nelas, para trasladar á sociedade -sobre todo ás persoas mozas- mensaxes contra a violencia de xénero, a prol da igualdade, e contra as discriminacións.

Dezasete persoeiros do mundo do deporte, a moda, o xornalismo, a investigación ou as artes, participarán na iniciativa que, tal e como reflectiu a conselleira, buscou recompilar testemuñas de personaxes relevantes desde unha óptica multidisciplinar “para que, coa súa voz, criterio e experiencia, conseguisen chegar a transmitir o que a Consellería de Promoción do Emprego e a Igualdade fai co seu traballo diario”.

O Goberno galego aproveita a eficacia demostrada que teñen as Redes Sociais, para aproveitala e comunicar  cuestións  de transcendencia relacionadas coa igualdade entre mulleres e homes, a loita contra a violencia de xénero, a reivindicación de dereitos e liberdades, a reeducación sobre estereotipos moi prexudiciais, a maior tolerancia á diversidade, o rexeitamento absoluto á discriminación.

“Son moitos os retos e as cuestións latentes de carácter estrutural ás que debe facer fronte nosa sociedade, e as redes sociais poden ser unha moi boa ferramenta para achegarse a temas sensibles ou conflitivos dun xeito amable e pouco invasivo, sobre todo no que a mocidade se refire”, especificou Lorenzana. A conselleira fixo un chamamento á xente nova xa que, como destacou, segue sen recoñecer de pleno a violencia de xénero na contorna dixital “normalizando o control das parellas a través de dispositivos móbiles, influíndo seriamente nunha situación de maltrato psicolóxico, e establecendo roles de poder diferentes que adoitan situar ao xénero feminino nun estatus inferior ao masculino”.

Por este motivo a Xunta conta nesta campaña con persoas referentes, para que as e os guíen e lles expliquen como identificar, primeiro, e despois como combater as desigualdades que aínda persisten.

Tal e como remarcou a conselleira, con iniciativas como #IgualdadeFollowers a Xunta “aspira  a provocar un efecto dominó, un efecto multiplicador no que a xente fale, comente, comparta, debata, reflexione, defenda, visibilice... e axude a mudar perspectivas cara outras máis evolucionadas e fidedignas”.

A campaña desenvólvese en colaboración coa Asociación de Periodistas de Galicia e contará coas contribucións de persoas con ampla presenza en redes que suman milleiros de seguidores: Omaira Marcos (influencer especializada en moda), Adiaratou Iglesias (atleta, medalla de ouro e prata nos Xogos Olímpicos de Toquio), Manuel Jabois (xornalista e escritor), Ana Freire (enxeñeira e investigadora), Eva Porto (influencer especializada na busca de emprego), Paola Freire (especialziada en gastronomía), Héctor Castiñeira (enfermeiro e divulgador sanitario), José Tubío (premio internacional de investigación sobre cancro), Patricia González (capitana do equipo de fútbol sala Pescados Rubén de Burela), Lara Lars (ilustradora e arquitecta), Natalia Álvarez (CEO de Walamami), Luis Zahera (actor), Daniel Minimalia (músico, gañador de Grammy Latino 2020), Nuria Pérez (escritora), Emma Lustres (produtora audiovisual), Javier Gómez Noya (triatleta), e Óscar Pereiro (ciclista e comentarista deportivo).