A conselleira de Medio Ambiente, Territorio e Vivenda participou hoxe nunha xornada de doazón, organizada pola Consellería e a Axencia Galega de Sangue, Órganos e Tecidos
Ángeles Vázquez valora a conciencia solidaria da cidadanía galega que fixo máis de 3 millóns de doazóns de sangue desde 1993
Lembra a importancia de doar sangue como un xesto altruista grazas ao cal se poden salvar moitas vidas
Fai un chamamento especial aos doantes do grupo 0+ xa que se atopa en nivel baixo para aumentar e recuperar o seu ritmo normal
A conselleira de Medio Ambiente, Territorio e Vivenda, Ángeles Vázquez, valorou a conciencia solidaria da cidadanía galega, que fixo máis de 3 millóns de doazóns de sangue desde 1993, e lembrou a importancia de doar sangue como un xesto altruista grazas ao cal se poden salvar moitas vidas.
Despois de pasar a doar pola unidade móbil da Axencia Galega de Sangue, Órganos e Tecidos (ADOS) instalada detrás do edificio da Consellería, Ángeles Vázquez incidiu en que os hospitais galegos necesitan cada día entre 400 e 500 doazóns de sangue para atender unha media de 2.800 urxencias, máis de 800 intervencións cirúrxicas e ao redor de 3 transplantes de órganos e tecido, ademais de 1.600 consultas nos hospitais de día.
Co obxectivo de contribuír a atender esa demanda, o departamento autonómico colaborou novamente con ADOS na organización dunha xornada de doazón de sangue nas inmediacións do edificio administrativo de San Lázaro, unha localización escollida para facilitar que todo o persoal da Consellería se poida achegar ata a unidade móbil.
Así mesmo, a conselleira indicou que a maior demanda en Galicia céntrase nos grupos sanguíneos A+ e 0+, xa que son tamén os máis numerosos entre a poboación, pero lembrou que o 0-, ao ser doante universal, é un tipo de sangue que sempre se necesita nos centros hospitalarios porque se pode empregar con todos os pacientes.
A maiores, fixo un chamamento especial aos doantes do grupo 0+ xa que se atopa en nivel baixo para aumentar e recuperar o seu ritmo normal.