A Xunta destina a cuarta parte do investimento en cooperación para o desenvolvemento ao ámbito educativo, con 5,5 M€ desde 2018

Santiago de Compostela, 7 de xuño de 2022 O vicepresidente segundo e conselleiro de Presidencia, Xustiza e Deportes, Diego Calvo, destacou hoxe a aposta da Xunta pola educación no investimento en cooperación para o desenvolvemento, ao concentrar este sector 5,5 millóns de euros no período 2018-2021 de vixencia do IV Plan Director da Cooperación Galega, o que supón a cuarta parte do total da axuda desembolsada. Así o sinalou no acto central da Campaña Mundial pola Educación (CME) no que participou xunto ao presidente do Parlamento de Galicia, Miguel Santalices.

Ambos recibiron a alumnos de seis centros educativos galegos -os CEIP Labarta Pose, Víctor Sáenz, Raquel Camacho, As Vendas da Barreira, Virxe da Cela e o IES Aguiar Betanzos- e da Universidade de Santiago de Compostela (USC) que traballan coas ONGD Educo, Axuda en Acción, Entreculturas e Taller de Solidaridad, que actualmente traballan no equipo territorial en Galicia da CME. O grupo de alumnos trasladaron en nome de toda a comunidade educativa as súas peticións en torno ao Obxetivo 4 dos Obxectivos de Desenvolvemento Sostible 2015-2030 que busca garantir unha educación inclusiva, equitativa e de calidade e promover oportunidades de aprendizaxe durante toda a vida.

Diego Calvo apelou a cumprir o lema deste ano da campaña, Mil millóns de voces para a educación, e reivindicar a necesidade de abordar a crise educativa global agravada pola pandemia da covid-19.

A Xunta colabora con esta campaña desde 2008 prestando apoio aos proxectos das ONGD que se agrupan para levar a cabo esta iniciativa no marco da convocatoria de subvencións para proxectos de Educación para o Desenvolvemento Global e da Cidadanía. Esta orde de axudas mobilizou 3 millóns de euros no período 2018-2021 en actuacións orientadas a construir unha cidadanía comprometida coa transformación social, a solidariedade e o desenvolvemento humano sustentable. Entre elas a campaña presentada hoxe que ten recibido ao abeiro destas axudas máis de 463.100 euros desde 2008, incluíndo os case 45.000 euros do ano pasado. 

Ademais destas axudas, desde a Cooperación Galega tense prestado unha atención especial á educación tamén nas actuacións de cooperación no exterior con 2,1 millóns de euros entre 2018 e 2021 xunto con 360.000 euros no mesmo período para a educación en emerxencia que suponen un 10% do total de 3,6 millóns de euros dirixidos a actuacións de acción humanitaria e emerxencia.

Por outra banda, a Xunta está a dar resposta ao impacto do coronavirus no dereito á educación en todos os países coa Estratexia de resposta á covid-19 da Cooperación Galega elaborada en consenso co sector. Este documento aprobouse o ano pasado co obxectivo de adaptar os mecanismos de financiamento do vixente Plan director da Cooperación Galega nas comunidades e países socios ás prioridades sectoriais e estratéxicas na realidade actual e no contexto da pandemia. Deste xeito, preténdese contribuír a paliar o abandono e o fracaso escolar, o peche de centros educativos ou o traballo infantil.

Ademais, a educación inclusiva e de calidade forma parte das prioridades de actuación do Plan Estratéxico de Galicia 2022-2030 co que a Xunta está a deseñar a Galicia do futuro.

No ámbito da Cooperación para o Desenvolvemento, o Goberno galego xa está a traballar no próximo V Plan Director da Cooperación Galega 2023-2026 cos axentes de cooperación que terá como un dos eixos da actuación a educación. Así se recolle tamén na Lei 10/2021, reguladora da acción exterior e da cooperación para o desenvolvemento de Galicia.