A Xunta presenta o campo de voluntariado ‘Aldea Alfacuca’ que se celebrará en Mos entre o 26 de xullo e o 6 de agosto

A directora xeral de Xuventude, Participación e Voluntariado, Cristina Pichel, e a alcaldesa de Mos, Nidia Arévalo, presentaron o novo campo de voluntariado Aldea Alfacuca que terá lugar entre o 26 de xullo e o 6 de agosto nesta localidade pontevedresa. Esta proposta, destinada a mozas e mozos de entre 18 e 30 anos, forma parte da campaña O verán que queres contar da Xunta de Galicia.

O campo de voluntariado Aldea Alfacuca contará con 15 prazas e estará centrado principalmente no coidado do medio ambiente. Estará localizado na parroquia de Louredo, onde se atopa unha aldea restaurada con edificacións datadas ao redor de 1670.

As mozas e mozos que formen parte desta actividade poderán participar na creación dunha horta biointensiva, nun composteiro para uso veciñal ou no deseño dun pequeno museo etnográfico e dunha Aula da Natureza, entre outros aspectos relacionados coa natureza.

Ademais diso, os participantes poderán realizar outras actividades complementarias como visitas a Porriño, a Vigo, a Redondela, á Illa de San Simón ou a Valença do Miño. Tamén terán unha programación para impulsar a convivencia a través de celebracións e foliadas. As inscricións están abertas na páxina web de Xuventude.

A maior oferta de verán da historia

Así mesmo, Cristina Pichel tamén destacou que a oferta da campaña de verán para este ano é a máis alta da historia, ao contar con máis de 10.800 prazas, tres mil máis que o ano pasado e mil máis que antes da pandemia. Este ano, a Xunta de Galicia pon en marcha 45 campos de voluntariado polas catro provincias, dos cales 9 son novidade.