A Xunta apoia na comarca do Barbanza a contratación de 76 persoas desempregadas como socorristas e para a prevención de incendios
O delegado da Xunta informou que, nesta área, a Consellería de Emprego e Igualdade investirá máis de 439.000 euros para a contratación de persoas desempregadas para desenvolver este tipo de tarefas a través de dúas convocatorias de axudas que veñen de resolverse
A Xunta financia os contratos que terán que estar vinculados, por un lado, á silvicultura, xestión de biomasa e valorización forestal ou planificación preventive, no caso de Aprol rural, e, doutro lado, á realización de servizos de interese xeral ou social, como é a vixilancia de praias
Noia (A Coruña), 18 de maio de 2022.- O delegado da Xunta na Coruña, Gonzalo Trenor, acompañado polo alcalde de Noia, Santiago Freire, visitou o Concello para anunciar que a Consellería de Emprego e Igualdade financiará con máis de 439.000 euros a contratación de 76 persoas desempregadas en concellos da comarca do Barbanza; dos cales, 59 (200.000 euros) destinaranse á tarefa de socorristas e 17 (238.000 euros) contrataranse, a través do programa Aprol Rural, para que poidan levar a cabo tarefas de prevención de incendios como son a planificación preventiva, a valorización forestal, a silvicultura, limpeza de montes e xestión de biomasa. O Concello de Noia contará con 4 socorristas e 2 incorporacións do programa Aprol rural grazas a un investimento global de 40.380 euros.
No marco do programa de socorristas, o Goberno autonómico inviste 1,5 millóns de euros para apoiar en preto de 200 concellos galegos a contratación de máis de 450 desempregados e desempregadas para a realización de obras ou servizos de interese xeral e social que os concellos soen destinar á contratación de persoal para a vixilancia das praias e espazos fluvais ou piscinas municipais. Os contratos serán de tres meses -no caso de que sexan a tempo completo- ou de seis meses para os de tempo parcial con contías que irán dos 1.555 euros aos 2.700 euros segundo o grupo de cotización das persoas contratadas. Con esta medida a Xunta persegue mellorar a empregabilidade das persoas participantes e colaborar coas entidades locais co obxectivo de dinamizar o mercado laboral galego.
No ámbito do programa Aprol Rural, prevese a contratación de 550 persoas desempregadas en toda Galicia en 285 municipios rurais. Os apoios a percibir polas entidades locais, neste caso, van dos 13.970 euros aos 20.250 euros en concepto de gastos salariais segundo o grupo de cotización financiados ao 100% pola Xunta. Tiveron prioridade os concellos fusionados e os emprendedores. Os contratos terán unha duración de 9 meses a tempo completo.
O obxectivo destas axudas é proporcionar ás persoas sen traballo que habitan nos concellos rurais de Galicia -aqueles que non contan con ningunha zona densamente poboada a nivel parroquial- unha experiencia práctica e profesional necesarias para facilitar a súa inserción no mercado de traballo.
Aprol Rural forma parte dunha medida activa de emprego dirixida á mellora da ocupabilidade das persoas sen un posto laboral. Os traballadores e traballadoras que se contraten terán que estar inscritos no Servizo Público de Emprego de Galicia (SPEG).
Con todas estas medidas a Xunta persegue mellorar a empregabilidade das persoas participantes e colaborar coas entidades locais na integración laboral de persoas vulnerables co obxectivo de dinamizar o mercado laboral galego.
APROL RURAL BARBANZA | ||
CONCELLO | TRABALLADORES | AXUDA CONCEDIDA |
PORTO DO SON | 2 | 27.940,00 € |
BOIRO | 2 | 28.970,00 € |
MUROS | 2 | 27.940,00 € |
RIBEIRA | 2 | 27.940,00 € |
RIANXO | 2 | 27.940,00 € |
NOIA | 2 | 27.940,00 € |
MAZARICOS | 1 | 13.970,00 € |
LOUSAME | 1 | 13.970,00 € |
OUTES | 1 | 13.970,00 € |
CARNOTA | 1 | 13.921,47 € |
POBRA DO CARAMIÑAL (A) | 1 | 13.970,00 € |
TOTAL APROL RURAL BARBANZA | 17 | 238.471,47 € |
SOCORRISTAS BARBANZA | ||
CONCELLO | TRABALLADORES | AXUDA CONCEDIDA |
RIBEIRA | 8 | 24.880,00 € |
PORTO DO SON | 8 | 30.400,00 € |
MUROS | 6 | 20.400,00 € |
POBRA DO CARAMIÑAL (A) | 6 | 19.200,00 € |
OUTES | 6 | 18.660,00 € |
LOUSAME | 1 | 3.110,00 € |
CARNOTA | 6 | 22.110,00 € |
BOIRO | 8 | 30.944,00 € |
NOIA | 4 | 12.440,00 € |
RIANXO | 6 | 18.660,00 € |
TOTAL SOCORRISTAS BARBANZA | 59 | 200.804,00 € |
TOTAL SOCORRISTAS+APROL BARBANZA | 76 | 439.275 € |