A Xunta e o Concello de Betanzos constatan as melloras nos servizos de transporte público do municipio e acordan colaborar para manter o seguimento

A Xunta e o Concello de Betanzos constataron hoxe as melloras rexistradas nos servizos de transporte público do municipio, así como o incremento da satisfacción dos usuarios, e acordaron colaborar para manter activo o seguimento das liñas.

O director xeral de Mobilidade, Ignacio Maestro, mantivo hoxe un encontro de traballo coa alcaldesa, María Barral, na que analizaron a situación en relación cos servizos de transporte interurbano que funcionan no concello de Betanzos.

No encontro, coincidiron en sinalar a eficacia dos reforzos introducidos o pasado mes de xaneiro para atender a demanda de usuarios cara ao Complexo Hospitalario Universitario da Coruña (CHUAC) nas fins de semana, así como da nova expedición anunciada, que operará desde Ferrol a primeira hora da tarde a partir do vindeiro 29 de abril.

Con esa expedición, os núcleos de poboación de Miño e de Paderne ampliarán tamén a cobertura dos servizos que lles permiten desprazarse de luns a venres ás 15:20 horas ata Betanzos. En concreto, ampliarase ata Betanzos a liña que actualmente presta servizo nos días de semana entre Miño e Ferrol, que alonga o seu percorrido para atender tamén os desprazamentos entre as poboacións intermedias

A Xunta acreditou, ademais, a incidencia das obras que o Ministerio de Transportes, Mobilidade e Axenda Urbana está a executar actualmente na AC-12 (antiga N-VI) no coñecido como ‘Cruce de Sol y Mar’, provocando retrasos nos horarios dos autobuses, especialmente nas horas punta de entrada e saída da cidade.

O Goberno galego xa puxo en coñecemento da Subdelegación do Goberno na Coruña esta situación, solicitando a adopción de medidas para a circulación prioritaria do transporte público, medidas que non foron atendidas polo momento.

Ademais, Maestro comentou as diferenzas entre a situación actual e a que existía coa anterior concesión, en que todos os servizos de transporte eran prestados por unha única empresa.

Agora, os autobuses que prestan servizo desde Betanzos, ben ata A Coruña ben ata Ferrol, non pertencen unicamente ao contrato ‘XG-871 A Coruña-Ferrol’, cuxo concesionario é a UTE Hércules Norte, senón que tamén hai servizos entre estas localidades que se prestan a través dos contratos A Coruña-Ourense-A Mariña (XG-843) e A Coruña-Lugo (XG-635), ambos prestados pola empresa Autos Carballo, do Grupo Arriva.

Con este novo reparto, a oferta de servizos é similar á que prestaba a anterior concesionaria, con melloras e adaptacións ás novas demandas detectadas.

Así, entre A Coruña e Betanzos, e viceversa, existen agora 36 e 38 expedicións que de luns a venres, de ida e volta respectivamente, que atenden a franxa horaria 06:05 ata ás 22:30 e que, nas fins de semana, as máis de 17 expedicións diarias por sentido atenden a franxa de 08:00 ata ás 22:30 horas.

Se ben as melloras introducidas nos últimos meses fixeron aumentar o nivel de satisfacción dos usuarios do transporte público, a Xunta manterá activo o permanente seguimento do funcionamento da liña e da súa relación coa demanda dos usuarios.

Así, o director xeral de Mobilidade, garantiu que se analizarán as posibles necesidades que queden pendentes, para o cal resulta imprescindible que o Concello as formule de forma concreta.

Actualmente, un total de 972 mozos menores de 21 anos de Betanzos viaxan gratis nos autobuses da Xunta coa tarxeta Xente Nova.

O representante do Goberno galego advertiu da necesidade de que se modernice a infraestrutura e os servizos ferroviarios entre Ferrol e A Coruña para poder mellorar a mobilidade dos veciños de Betanzos.

Ademais, trasladou a preocupación da Xunta ante o anteproxecto de Lei de mobilidade sostible que promove o Goberno de España, establecendo que as administracións que soliciten un servizo de transporte deberán financialo, con independencia de quen sexa o titular da competencia.

Ese texto normativo, ante o cal o Executivo autonómico xa formulou alegacións, parte dunha concepción exclusivamente urbana da mobilidade e ignora as necesidades de transporte público do rural e dos municipios pequenos e medianos.