Miranda destaca, durante a entrega do premio Gallego del año do Club de Periodistas Gallegos en Madrid, a aposta de Galicia polo deseño e a innovación do que a empresa sargadelos é referente

o secretario xeral da emigración, Antonio Rodríguez Miranda, destacou que Galicia está a xerar un ecosistema de deseño e innovación orientado ao desenvolvemento económico e social que está a ser referente dentro e fora das súas fronteiras e do que é “un claro exemplo a empresa Sargadelos” a quen se lle fixo entrega do premio Gallego del Año do Club de Periodistas Gallegos en Madrid, que recolleu o vicepresidente da Fundación Sargadelos, Alberto Leiro, durante unha gala celebrada onte no hotel Preciados da capital de España.

Tamén asistiron a este evento a vicepresidenta segunda do Congreso dos Deputados, Ana Pastor, así como a presidenta do Club de Periodistas Gallegos en Madrid, Pilar Falcón, o director general do grupo El Progreso, José de Cora Paradela e o alcalde de Cervo, Alfonso Villares, concello onde se atopa situada a empresa de cerámica. Durante o seu discurso, Rodríguez Miranda engadiu que “o deseño e a innovación, como a que está a ofrecer Sargadelos, é unha expresión de talento que marca a diferencia nos produtos e servizos feitos en Galicia, tanto dende o punto de vista tecnolóxico, creativo, sostible e de benestar social. Estamos nun momento de oportunidades para reinventarnos e crear máis riqueza e máis emprego de calidade”.