A Xunta destaca o Camiño de Santiago como símbolo da unión dos pobos europeos
O director xeral de Relacións Exteriores e coa Unión Europea, Jesús Gamallo, reuniuse co Embaixador do Consello de Europa Patrick Engelberg no marco do “XII Congreso Internacional de Estudos Xacobeos” celebrado estes días na cidade compostelá
O director xeral de Relacións Exteriores e coa Unión Europea, Jesús Gamallo, reuniuse hoxe co Embaixador representante permanente de Luxemburgo no Consello de Europa, Patrick Engelberg, que preside o Comité Estatutorio do Acordo Parcial Ampliado sobre os Itinerarios Culturais en Europa.
A reunión enmárcase XII Congreso Internacional de Estudos Xacobeos, que inaugurou onte en Santiago de Compostela o vicepresidente primeiro da Xunta, Alfonso Rueda xunto con outras autoridades como o embaixador Engelberg.
Durante o encontro o director xeral, Jesús Gamallo, destacou o valor histórico e cultural das rutas xacobeas como símbolo da unión dos pobos europeos e salientou que o Camiño de Santiago fose declarado en 1987 primeiro Itinerario Cultural Europeo polo Consello de Europa e en 1993 pola Unesco Patrimonio da Humanidade.
Outros dos temas tratados foron o de o papel do Consello de Europa ante a guerra de Ucraína, así como a necesidade de que as autoridades rexionais colaboren e se mostren solidarios na acollida de refuxiados.
Consello de Europa
O Consello de Europa, con sede en Estrasburgo (Francia) é unha organización internacional de ámbito europeo que ten como fin promover a defensa dos dereitos humanos e a democracia. Está composto por 46 estados dos cales 27 son estados membros da Unión Europea. No seo do Consello de Europa atópase o programa de Rutas Culturais que declarou en 1987 o Camiño de Santiago como Primeiro Itinerario Cultural Europeo.