Fabiola García destaca que as familias galegas aforran de media 1900 euros ao ano por neno grazas á gratuidade das escolas infantís

A conselleira de Política Social, Fabiola García, destacou hoxe que as familias galegas aforran de media 1900 euros ao ano por neno grazas á gratuidade nas escolas infantís que implantou a Xunta de Galicia hai dous anos para segundos e sucesivos fillos, e que a partir de setembro se aplicará tamén aos primeiros. Fíxoo nunha visita a unha das escolas infantís que Pequerrechos ten en Santiago de Compostela.

Fabiola García sinalou que Galicia é a única comunidade en España na que xa se aplica a gratuidade na atención educativa infantil, da que desde o vindeiro curso se poderán beneficiar todas as nenas e nenos en todas escolas infantís, independentemente da súa titularidade. Deste xeito, o Goberno galego investirá este ano máis de 30 millóns de euros para que máis de 30.000 familias teñan gratis a atención educativa nas escolas infantís.

A conselleira de Política Social subliñou, neste sentido, que estes centros representan un servizo imprescindible para a conciliación das familias e tamén para o desenvolvemento dos nenos. Os tres primeiros anos de vida son de grande importancia, xa que neste período é cando os pequenos aprenden a controlar o seu corpo, a interactuar coa súa contorna e a desenvolver habilidades cognitivas.

Por esta razón, Fabiola García salientou que o compromiso de Galicia coa educación de 0 a 3 anos non remata coa gratuidade, e explicou que o Goberno galego seguirá reforzando esta etapa cun plan de formación destinado aos profesionais das escolas, que permitirá actualizar, mellorar e innovar os proxectos educativos e ofrecer un servizo de maior calidade.