A Xunta anuncia a creación dun Plan de formación destinado ao persoal das escolas infantís

A Xunta creará un plan de formación para o persoal das escolas infantís que permitirá actualizar, mellorar e innovar nos proxectos educativos dos centros galegos. O director xeral de Familia, Infancia e Dinamización Demográfica, Jacobo Rey, e o xerente do Consorcio Galego de Igualdade e Benestar, Perfecto Rodríguez, participaron esta mañá nas xornadas sobre os retos na educación de 0-3 anos con profesionais do sector que tivo lugar na Cidade da Cultura.

Nestas xornadas, profesionais de distintos centros de toda a Comunidade tiveron a oportunidade de conversar e compartir experiencias sobre o seu traballo e os retos de cara ao futuro a través de dúas mesas redondas. Entre os temas a debate tratáronse metodoloxías e accións innovadoras, o fomento da atención á diversidade ou o uso de espazos exteriores para a vida cotiá.

Jacobo Rey e Perfecto Rodríguez resaltaron que as escolas infantís teñen demostrado ser, ademais dun servizo de conciliación fundamental para as galegas e galegos, un lugar no que os máis pequenos gañan en habilidades e dan os seus primeiros pasos cara o coñecemento. Destacaron o importante papel que desempeñan os profesionais deste sector por ser quen de identificar posibles problemas no desenvolvemento e por fomentar a súa creatividade a través das máis innovadoras metodoloxías pedagóxicas.

Gratuidade de todas as escolas

Os representantes do Goberno galego lembraron que Galicia leva anos ofrecendo facilidades de acceso a esta etapa educativa para as familias. Neste sentido, apuntaron que a nosa Comunidade foi a primeira en ofrecer a gratuidade desta educación para segundos fillos e sucesivos e será a primeira en ampliala a todos os nenos en todas as escolas infantís a partir do próximo curso académico. Unha medida que beneficiará a 30.000 familias galegas e que contará cun investimento de 30 millóns de euros.

A este respecto resaltaron que ningunha familia debería decidir se levar aos seus fillos a unha escola infantil por motivos económicos. Deste xeito, a Xunta de Galicia fomenta a igualdade de oportunidades e permite que as nenas e nenos transcorran por todas as fases da ensinanza, desde a infantil ata o bacharelato, sen que os seus pais teñan que pagar nin un só euro.