A Xunta apoia a 9 empresas da área de Santiago a través do programa Galicia emprende con máis de 2,5 millóns de euros para crear ou manter 61 empregos

O delegado da Xunta na Coruña, Gonzalo Trenor, visitou esta mañá o local La Curiosa, pertencente á empresa Fish Factory, unha das beneficiarias, no ano 2019, pola orde de axudas Galicia Emprende que promove apoios de para a posta en marcha ou a consolidación temperá de empresas impulsadas por persoas autónomas e emprendedoras, facilitando así a xeración de emprego. Con esta axuda púxose en marcha este novo establecemento de conservas gourmet complementado cun servizo de catas dos produtos.

Na visita o representante do Goberno galego informou que, na convocatoria do Galicia Emprende do 2021, se están apoiando con 2,5 millóns de euros, outras 9 novas iniciativas empresariais na comarca de Santiago nos concellos de Santiago, O Pino, Teo e Touro coas que se prevé mobilizar 3,2M€ e crear ou manter máis de 60 empregos.

Trenor destacou que “o emprendemento configúrase como un dos piares básicos de actuación da Xunta de Galicia. Un camiño que precisa da implicación e a colaboración das administracións e dos axentes económicos e sociais na procura de seguir estimulando o crecemento económico”.

Por este motivo, a Vicepresidencia segunda e Consellería de Economía, Empresa e Innovación, a través do Igape, impulsa cada ano distintos programas e liñas de actuación neste ámbito entre os que destaca o Galicia Emprende ou o Galicia Emprende Rural.

Cómpre destacar que a través da resolución do ano pasado estanse a impulsar iniciativas empresarias en industrias moi diversas da economía galega. Entre elas pódese destacar o sector servizos, as políticas sociais, a hostalería, o comercio ou mesmo a investigación.

Deste xeito, o Goberno galego, a través do Igape, segue a promover as iniciativas emprendedoras no tecido empresarial da Comunidade. Neste marco, destacan tamén os novos espazos coworkings en Santiago de Compostela e nas comarcas de Ferrolterra (con sede en Ferrol) e da Costa da Morte (con sede en Cabana de Bergantiños) na provincia da Coruña.

Galicia Emprende Rural

A Xunta tamén ten aberto o prazo, ata o 8 de marzo, do programa Galicia Emprende Rural que achegará axudas por valor de 2 millóns de euros ao redor de 70 de autónomos e emprendedores, posibilitando a creación de preto de 200 empregos no medio rural.

Con esta nova edición, a Administración galega reforza a súa aposta polo emprendemento, fomentando a xeración de emprego mediante o apoio á creación de proxectos vinculados a actividades non agrícolas en zonas rurais.

Entre as actuacións industriais prioritarias que o Galicia Emprende Rural pretende impulsar figuran as de sectores como automoción, téxtil, aeronáutico, químico, medioambiental, TIC, audiovisual, pedra natural e industrias creativas, entre outras.

Nas súas tres edicións (2017, 2018 e 2019) o Galicia Emprende Rural apoiou un total de 180 proxectos, mobilizando máis de 18 M€ e axudas por importe de 10,9M€ permitindo a creación ou mantemento de 453 empregos.

O programa vén completar e mellorar o Programa Galicia Emprende, que no período 2017 - 2021 facilitou a aprobación de 365 proxectos emprendedores, con máis de 25 M€ en axudas e un mobilizado de máis de 54M€

En total coa suma destes dous programas a Xunta apoiou máis de 550 proxectos con axudas que ascenden a máis de 35 millóns de euros que movilizaron máis de 70 millóns de euros.