A Xunta aproba máis dun cento de cursos para formar no primeiro semestre ás forzas e corpos de seguridade na AGASP

A Estrada (Pontevedra), 8 de febreiro de 2022.- O Consello Reitor da Academia Galega de Seguridade Pública (AGASP) reuniuse hoxe para, entre outras cuestións, aprobar o plan anual de actividades para o presente ano que conta, no ámbito da seguridade pública, cun total de 104 actividades formativas neste primeiro semestre destinadas ás forzas e corpos de seguridade. No conxunto de todo o 2021 leváronse a cabo 169 cursos para a Policía Autonómica, Policía Nacional, Policía Local e Garda Civil con máis de 5.400 prazas e máis de 9.400 horas lectivas.
O director xeral de Emerxencias e Interior, Santiago Villanueva, presidiu a reunión e sinalou que entre os cursos previstos para este ano destaca o de especialista en violencia de xénero de 100 horas ou a actualización das últimas novidades lexislativas que afectan á actividade policial como a Lei de Tráfico ou a de seguridade cidadá.
Tamén se prestará especial atención ao eido social, en concreto, en actuacións con menores, persoas maiores e persoas vulnerables, para avanzar cara unha policía de convivencia. A formación vai enfocada tanto á policia de barrio -a máis próxima ao cidadán- incluíndo tamén actividades de prevención e outras máis encamiñadas á resolución de intervencións con cursos máis prácticos.
Ademais, este ano formarase na Academia á 14ª promoción da Policía Local, cos 70 alumnos que xa están en proceso de selección e que farán o terceiro exercicio desde mañá ata o venres, coas probas físicas que se celebrarán no Centro Galego de Tecnificación Deportiva de Pontevedra. A través desta vía cubriranse as prazas comunicadas por 29 municipios, no marco do convenio de colaboración entre a Xunta e os concellos galegos aos que están adscritas 89 entidades locais das 129 con corpos de Policía Local.
Tamén se prevé ao longo do primeiro semestre a publicación de distintas convocatorias para cubrir outras 16 prazas de inspectores e oficiais que integrarán a promoción de mandos que tamén se formará na Academia.
Por outra parte, como novidades para o persoal policial, porase en marcha unha nova aplicación denonimada AGASPFIT con actividades de exercicio físico e adestradores persoais, e un laboratoiro de evidencias electrónicas a disposición dos concellos con datos de valor útiles nas investigacións de accidentes de tráficos ou en delitos de violencia de xénero.
O Consello Reitor da AGASP aprobou tamén a realizacion alomenos dun curso mensual de habilitación de control de acceso a espectáculos públicos e actividades recreativas cun mínimo de 12 cursos anuais fronte a unha soa convocatoria anual de anos anteriores. Así, para este 2022 está prevista a realización de 18 cursos.
Nesta liña, cómpre lembrar que en marzo do ano pasado a Xunta aprobou o proxecto de decreto que regulará a actividade de control de acceso aos espectáculos públicos e actividades recreativas, así como aos establecementos ou espazos abertos ao público nos que se celebren, co obxectivo de dotar dunha regulación máis práctica e adaptada á realidade e á normativa actual respecto ao anterior decreto de 2010. En canto á formación do persoal de control de acceso, a nova norma substitúe as probas anuais para obter e renovar a habilitación por un curso de 6 horas na AGASP.
No encontro tamén se avaliou a formación prevista para os servizos de emerxencias cun total de 214 cursos con máis de 6.000 prazas e máis de 10.200 horas para cumprir coas demandas formativas e actualizando os coñecementos dos voluntarios de Protección Civil -que tamén deben pasar na AGASP o curso básico para obter o carné de voluntario- ou os efectivos dos Grupos de Emerxencias Supramunicipais, así como axentes forestais e medioambientais. Ademais reforzarase a formación en materia de socorrismo co obxectivo de fomentar a inscripción no Rexistro Profesional de persoal socorrista.
A AGASP manterá a aposta pola formación destes colectivos en liña, seguindo a reestructuración feita por mor da pandemia do coronavirus, e irá recuperando a formación presencial e descentralizada de maneira progresiva. Co obxectivo de contar con profesionais de emerxencias ben preparados a formación no ámbito das emerxencias aumenta en canto ao número de cursos dos 117 do ano pasado aos 214 previstos neste 2022.
Para todas estas actividades, a AGASP contará no 2022 cun orzamento de máis de 3,2 millóns euros, un 2,12% máis co ano pasado, e mellorará as súas instalacións coa posta en marcha dunha nova pista polideportiva para a realización de prácticas.